Senatning Byudjet va iqtisodiy masalalar qoʻmitasining bugungi majlisida “Byudjet jarayoni takomillashtirilishi munosabati bilan Oʻzbekiston Respublikasining ayrim qonun hujjatlariga oʻzgartirish va qoʻshimchalar kiritish toʻgʻrisida”gi Qonun muhokama etildi.

Muhokama davomida Qoʻmita aʼzolari soʻnggi yillarda fuqarolarni byudjet jarayoniga jalb qilish imkoniyatlarini kengaytirish orqali byudjet mablagʻlarini taqsimlashda shaffoflikni taʼminlash, ularning maqsadli sarflanishi ustidan jamoatchilik nazoratini kuchaytirish borasida tizimli ishlar amalga oshirilayotganligini qayd etdi.

Qonun bilan Maʼmuriy javobgarlik, Byudjet va Fuqarolik kodekslari hamda boshqa bir qator qonunlarga byudjet jarayonini takomillashtirishga qaratilgan oʻzgartirish va qoʻshimchalar kiritish nazarda tutilmoqda.

Jumladan, byudjet mablagʻlaridan foydalanish samaradorligini oshirish va jamoatchilik nazoratini kuchaytirish maqsadida byudjet hisoboti turlari kengaytirilmoqda.

Shu bilan birga birinchi darajali byudjet mablagʻlarini taqsimlovchilarning masʼuliyatini oshirish maqsadida byudjet mablagʻlaridan foydalanish bilan bogʻliq maqsadli indikatorlarning bajarilishi toʻgʻrisidagi hisobotlarni Qonunchilik palatasi qoʻmitalarida har chorak yakunida eshitib borish amaliyoti joriy etilmoqda.

Qoʻmita aʼzolari mazkur Qonun fuqarolarni byudjet jarayoniga keng jalb qilish imkoniyatlarini kengaytirish, byudjet mablagʻlarini taqsimlashda shaffoflikni taʼminlash va ulardan maqsadli sarflanishi ustidan nazoratni kuchaytirishga qaratilganligini alohida taʼkidladi.

Muhokama yakunida Qoʻmitaning tegishli qarori qabul qilindi.