Prezidentning “Aholini ijtimoiy himoya qilish tizimini moliyalashtirish tartib-taomillarini takomillashtirish toʻgʻrisida”gi farmoniga asosan 2025-yil 1-maydan boshlab qamoqdan ozod etilgan shaxslarga bir martalik nafaqa puli toʻlanadi. Bu haqida “Huquqiy axborot” kanali xabar berdi.

Farmonga muvofiq, 2025-yil 1-maydan ozodlikdan mahrum etish joylaridan ozod qilingan shaxslarga BHMning 6 baravari (2,25 million soʻm) miqdoridagi bir martalik nafaqa puli “Inson” ijtimoiy xizmatlar markazlari orqali toʻlanishi belgilangan.

Shuningdek, “Ijtimoiy daftarlar” jamgʻarmalari orqali koʻrsatiladigan ijtimoiy yordamlar Kambagʻal oilalar reyestriga kiritilgan oilalarga, uy-joy sharoitlarini yaxshilash va sogʻliqni saqlash boʻyicha ijtimoiy yordamlar esa – oylik daromadi oila aʼzolarining har biriga minimal isteʼmol xarajatlari miqdorining 2 baravaridan koʻp boʻlmagan oilalarga ham taqdim etiladi.

Eslatib oʻtamiz, avvalroq, Oliy Majlis Qonunchilik palatasida 1 ta kitob oʻqigan mahkumlarning jazo muddatini 3 kunga qisqartirishni nazarda tutuvchi qonun loyihasi muhokama qilingan edi.