Xoʻjand shahridagi sammitning madaniy dasturi doirasida Oʻzbekiston, Tojikiston va Qirgʻiziston davlat rahbarlari Xoʻjand qalʼasiga tashrif buyurib, uning tarixi bilan tanishdilar.

Bu noyob majmuaning qurilishi miloddan avvalgi IV-V asrlarga borib taqaladi. Arxeologik qazishmalar natijasida oʻsha davrda birinchi qalʼa bunyod etilganligi aniqlangan.

1999-yilda qayta taʼmirlash ishlaridan soʻng qalʼa yonida 28 mingdan ortiq eksponatni oʻz ichiga olgan oʻlkashunoslik muzeyi ochildi.

Soʻnggi restavratsiya ishlari jarayonida qalʼa devorlari, arki va darvozalari qayta tiklandi, maʼmuriy bino, hunarmandchilik doʻkonlari qurildi, Xoʻjandning qadimiy hovlilari namunalari yaratildi.

Hududda tojik xalqi tarixi va madaniyatiga oid 5 ta koʻrgazma zalidan iborat majmua barpo etildi. 8 ta hovlida hunarmandlar xattotlik, rassomchilik, adras toʻqish, soʻzana tikish, tosh oʻymakorligi, temirchilik va kulolchilik bilan shugʻullanmoqda.

Davlat rahbarlari uch mamlakatning hunarmandchiligi, qishloq xoʻjaligi mahsulotlari va milliy taomlari koʻrgazmasini koʻzdan kechirib, badiiy chiqishlarni tomosha qildilar.