Oʻzbekiston Respublikasi Prezidentining 2019-yil 24-avgustdagi “Davlat va xoʻjalik boshqaruvi hamda mahalliy ijroiya hokimiyati organlarining ishlab chiqarishni mahalliylashtirish va sanoat tarmoqlarida kooperatsiya aloqalarini jadallashtirishning yangi tizimini joriy etish boʻyicha masʼuliyatini yana-da oshirish toʻgʻrisida”gi qarori ijrosini taʼminlash maqsadida import qilinayotgan mahsulotlar hajmini qisqartirish hisobiga valyuta mablagʻlarini tejash rejalashtirilgan.

Ushbu ishlarni amalga oshirish uchun “Oʻzbekneftgaz” AJ Boshqaruv raisi tomonidan import oʻrnini bosuvchi mahsulotlar ishlab chiqaruvchi mahalliy korxonalar bilan mustahkam aloqalar oʻrnatish boʻyicha hujjat imzolandi.

Shunga asosan, joriy yilning aprel-may oylarida Muborak gazni qayta ishlash zavodida tabiiy gazni oltingugurt birikmalaridan tozalash qurilmalarida “SHTURVAL” MCHJ (Fargʻona viloyati) tomonidan ishlab chiqarilayotgan aktivlashgan koʻmir mahsuloti sinovdan oʻtkaziladi. Bu haqda AJ matbuot xizmati xabar berdi.

Sinov ishlari ijobiy natijani koʻrsatsa, fargʻonalik tadbirkor tomonidan taklif etilayotgan aktivlashgan koʻmir kimyoviy reagentini ishlab chiqarish jarayonida tatbiq etiladi.

Buning natijasida yillik 100-120 tonna miqdoridagi aktivlashgan koʻmirni chetdan olib kelish qisqaradi. Shuningdek, valyutani tejab qolishga va mahalliy kimyoviy reagent mahsulotlar ishlab chiqaruvchi korxonalarni qoʻllab-quvvatlashga erishiladi.

Maʼlumot uchun: aktivlashgan koʻmirning asosiy vazifasi gazni qayta ishlash jarayonida Metildietanolamin kimyoviy reagentini tarkibidagi mexanik birikmalarni tozalashdan iboratdir.