“Zargarlik buyumlarini ishlab chiqarish sohasini qoʻllab-quvvatlash boʻyicha qoʻshimcha chora tadbirlar toʻgʻrisida”gi Prezident qarori (PQ-207-son, 26.06.2025-y.) qabul qilindi. Bu haqda “Huquqiy axborot” Telegram kanalida xabar berildi.

Ushbu qarorni qabul qilishdan koʻzlangan asosiy maqsadlar etib quyidagilar belgilandi, jumladan:

• qimmatbaho metallarni qayta ishlashning yillik hajmini 7 tonnaga, zargarlik buyumlarini eksport qilish koʻrsatkichlarini 300 mln AQSH dollariga yetkazish;
• qimmatbaho metallar va zargarlik buyumlarining norasmiy aylanmasini kamida 50 foizga qisqartirish.

Qarorga koʻra, zargarlik markazlarida faoliyat yuritayotgan tadbirkorlarga quyidagi qoʻllab-quvvatlash choralari taqdim etiladi, jumladan:

• qimmatbaho metallarni kechiktirib toʻlash sharti bilan sotishda 90 kun ichida amalga oshirilgan toʻlovlar qismiga foiz hisoblanmaydi, 91-kundan boshlab 180-kungacha amalga oshirilgan toʻlovlar qismiga – yillik 3 foiz miqdorida foiz hisoblanadi;
• zargarlik markazlarida «Oʻzbekzargarsanoati« uyushmasi va Davlat asillik darajasi nazorati inspeksiyasining filiallari faoliyati (sayyor xizmat koʻrsatish) yoʻlga qoʻyiladi;
• zargarlik markazlarida faoliyat yuritayotgan tadbirkorlar “Oʻzbekzargarsanoati” uyushmasiga aʼzo boʻlganda aʼzolik badalini 50 foizlik chegirma bilan toʻlaydi.