Bugun, 17-noyabr kuni Milliy statistika tizimidagi islohotlarga bagʻishlangan “Milliy statistikada yangi bosqich: shaffoflik va xalqaro standartlar sari” xalqaro konferensiya va matbuot anjumani boʻlib oʻtdi.

Taʼkidlanishicha, yakuniy hisob-kitoblarga koʻra, 2024-yil yakuni bilan respublika yalpi ichki mahsulotining nominal hajmi amaldagi 1 454,6 trillion soʻmdan 1 535,4 trillion soʻmga yoki 5,6 foizga ortgan.

Shuningdek, yalpi ichki mahsulot AQSH dollari hisobida 115,0 milliard dollardan 121,4 milliard dollarga yetgan. Maʼlumot berilishicha, qayta hisoblashdan soʻng, 2024-yilda aholi jon boshiga yalpi ichki mahsulot hajmi 41,3 million soʻmni tashkil etgan.

2024-yil uchun davlat byudjeti ijrosining toʻliq qamrovi taʼminlanishi natijasida 36,4 trillion soʻm yangi qoʻshilgan qiymat aniqlangan. Sanoat sohasi boʻyicha 2024-yil uchun qoʻshilgan qiymat hajmi 12,7 trillion soʻmga oshgan. Shuningdek, qishloq xoʻjaligi sohasida 5,6 trillion soʻm, qurilish sohada 10,3 trillion soʻm va xizmatlar sohasida 16,3 trillion soʻm miqdorida yalpi qoʻshilgan qiymat qoʻshimcha hisoblandi.