Oʻzbekistonda kambagʻallik darajasi xalqaro standartlar asosida baholanganda 2024-yil yakunlariga koʻra sezilarli pasaygani aniqlandi. Unga koʻra, kambagʻallik darajasi 11 foizdan 8,9 foizga kamaygan. Bu haqida Bandlik vazirligi matbuot xizmati maʼlumot berdi.

Qayd etilishicha, kambagʻallik darajasining eng yuqori pasayishi kuzatilgan hududlar orasida Buxoro viloyati 11,8 foizdan 8,7 foizga tushib yetakchilikka erishgan. Samarqand viloyati 10,5 foizdan 7,5 foizga, Namangan viloyati 10,4 foizdan 7,6 foizga pasayib ikkinchi va uchinchi oʻrinlarda egalladi.

Qoraqalpogʻiston Respublikasidagi kambagʻallik darajasi 13,6 foizdan 10,8 foizgacha pasaygani qayd etildi.

“2024-yilda aholi bandligini taʼminlash, tadbirkorlikka jalb qilish, tomorqa va dehqonchilik uchun ajratilgan yer maydonlaridan foydalanish samaradorligini oshirish boʻyicha koʻrilgan choralar mamlakatda kambagʻallik darajasini pasaytirishga katta hissa qoʻshdi”, — deyiladi xabarda.

Shuningdek, oʻtgan yil soʻngidagi aholining real daromadi yil boshidagi daromaddan 10,7 foizga oʻsib, jon boshiga oyiga oʻrtacha 2,1 mln soʻmdan toʻgʻri kelganligi qayd etilgan.

Bundan tashqari, aholi daromadlarining 42,6 foizini ish haqi tashkil qilgan. Ushbu koʻrsatgich 2023-yilgi 41,9 foizdan 0,7 foizga oʻsganligini koʻrsatadi. Tadbirkorlikdan daromadlar – 22,9 foiz (2023-yilda 21,4 foiz), pensiya, ijtimoiy yordam va subsidiyalar – 18,2 foiz (18,9 foiz), qishloq xoʻjaligi va tomorqadan daromadlar – 10,7 foiz (9,8 foiz), xorijdan pul oʻtkazmalar – 2,0 foiz (3,1 foiz) va boshqa daromadlar – 3,6 foizga oshganligi aniqlangan.