Oʻzbekiston Respublikasi Prezidenti Shavkat Mirziyoyev 9-sentyabr kuni Finlyandiya Prezidenti Aleksandr Stubb bilan telefon orqali muloqot qildi.

Oʻzbekiston bilan Finlyandiya oʻrtasidagi koʻp qirrali hamkorlikni, eng avvalo, savdo-iqtisodiy va gumanitar sohalarda yanada kengaytirish masalalari Finlyandiya Prezidentining mamlakatimizga boʻlajak tashrifiga tayyorgarlik nuqtayi nazaridan atroflicha koʻrib chiqildi.

Konstruktiv siyosiy muloqotlar va parlamentlararo almashinuvlar davom etayotgani mamnuniyat bilan qayd etildi. 2024-yilda tovar ayirboshlash 24 foizga oshdi. 2022-yildan mamlakatimizda Finlyandiyaning “Nordik” universiteti muvaffaqiyatli faoliyat yuritmoqda, maktab taʼlimini rivojlantirish boʻyicha loyihalar amalga oshirilmoqda.

Qishloq xoʻjaligi, kimyo, energetika, konchilik, telekommunikatsiya va boshqa innovatsion tarmoqlarda kooperatsiyani yoʻlga qoʻyish, jumladan, taʼlim tizimiga ilgʻor texnologiyalarni joriy etish imkoniyatlariga alohida eʼtibor qaratildi.

Aniq loyihalarni tayyorlash uchun Hukumatlararo komissiya yigʻilishi va ikki mamlakat yetakchi kompaniyalari ishtirokida biznes forumini oʻtkazish taklif qilindi.

Xalqaro ahamiyatga molik dolzarb masalalar yuzasidan fikr almashildi. Nizolarni xalqaro huquq normalari asosida tinch yoʻl bilan hal etish muhimligi taʼkidlandi.