Belarus Respublikasi Prezidenti Aleksandr Lukashenkoning mamlakatimizga amalga oshirayotgan rasmiy tashrifi doirasida jami 19 ta bitim imzolanishi rejalashtirilgan. Shulardan ikkitasi davlatlararo, 6 tasi hukumatlararo va 8 tasi idoralararo kelishuvlardir.

Bu haqda Oʻzbekiston Respublikasi Prezidenti huzuridagi Strategik va mintaqalararo tadqiqotlar instituti boʻlim boshligʻi Milana Bazarova matbuot markazidagi chiqishi davomida maʼlum qildi. Mutaxassisning taʼkidlashicha, muhim bitimlardan biri harbiy-texnikaviy hamkorlikni rivojlantirish toʻgʻrisidagi kelishuvdir. Bu harbiy mahsulotlarni ishlab chiqarish boʻyicha tajriba almashishni oʻz ichiga oladi. Belorussiya harbiy mahsulot va qurol ishlab chiqarish boʻyicha dunyoning yigirmata eng yirik davlatlaridan biri sanaladi. Mamlakatning 2017 yilda harbiy texnika mahsulotlarini yetkazib berish koʻrsatkichi bir milliard AQSH dollaridan oshdi. Qolgan shartnomalar sogʻliqni saqlash, turizm, qishloq xoʻjaligi, oliy taʼlim va boshqa sohalardagi hamkorlikni rivojlantirishni nazarda tutadi.