AQSHda Kubadan kelayotgan milliy xavfsizlikka tahdid sabab favqulodda holat rejimi joriy etildi. AQSH prezidenti Donald Tramp bu haqda tegishli farmonni imzoladi.

Hujjatga koʻra, AQSH Kubaga toʻgʻridan-toʻgʻri yoki bilvosita neft yetkazib berayotgan har qanday davlatdan import qilinadigan mahsulotlarga qoʻshimcha boj toʻlovlarini joriy etish huquqiga ega boʻladi.

Tramp ushbu qarorni Kuba hukumati tomonidan koʻrilgan “favqulodda choralar” AQSH manfaatlariga zarar yetkazayotgani va milliy xavfsizlikka tahdid solayotgani bilan izohladi.

Farmonda taʼkidlanishicha, Kuba hukumati AQSHga nisbatan dushmanona pozitsiyadagi davlatlar va guruhlar, jumladan Rossiya, Xitoy, Eron, shuningdek HAMAS va “Hizbulloh” bilan hamkorlik qilmoqda.

“Milliy favqulodda vaziyatni bartaraf etish maqsadida quyida bayon etilgan tarif tizimini joriy etishni zarur va maqsadga muvofiq deb hisoblayman. Ushbu tizimga muvofiq, Kubaga toʻgʻridan-toʻgʻri yoki bilvosita neft sotadigan yoki yetkazib beradigan xorijiy davlat mahsulotlariga qoʻshimcha advalor boj toʻlovi undirilishi mumkin”, — deyiladi hujjatda.

Bundan avval Tramp Kuba Venesuelaga bogʻliq boʻlib qolgani, u yerdan neft va moliyaviy yordam olib kelganini aytgan edi. AQSH prezidentining fikricha, hozirda Kuba “ip ustida turibdi” va iqtisodiy tanazzul yoqasida qolgan.