Foto: AP

Buyuk Britaniya hukumati fuqarolarga infratuzilmaga hujumlar sodir boʻlishi va elektr taʼminotida uzilishlar yuz bergan taqdirda omon qolish uchun uch kunlik zaxiralarni tayyorlashni tavsiya qilmoqda.

“Daily Mail” nashrining yozishicha, toʻplamda suv, tez buzilmaydigan oziq-ovqat, dori-darmon, akkumulyatorli radio, chiroq, shaxsni tasdiqlovchi hujjatlar va Shveysariya armiyasi pichogʻi boʻlishi kerak.

Bunday tavsiyalar Rossiya sabotaj qilishi mumkin boʻlgan, goʻyoki ekspertlarning energiya infratuzilmasiga, jumladan, Norvegiyadagi mamlakatda isteʼmol qilinadigan gazning 40 foizini yetkazib beradigan Langeled gaz quvuriga ehtimoliy hujumlar haqidagi xavotirlari sabab berilgan.

Gazetaga koʻra, vaziyat Buyuk Britaniyaning energetika siyosati yanada ogʻirlashtirmoqda. Uglerod neytralligiga oʻtish koʻmirda ishlaydigan elektr stansiyalarining yopilishiga olib keldi, bu esa mamlakatni elektr energiyasi importiga qaram qilib qoʻydi. Buyuk Britaniya faqat favqulodda zaxiralar va Daniyadan keladigan elektr taʼminoti tufayli qishda katta uzilishlarni chetlab oʻtadi.

Avvalroq, Yevropa Komissiyasi ham xuddi shunday “omon qolish toʻplami”ni yigʻishni tavsiya qilgan. Unda suv, oziq-ovqat, birinchi tibbiy yordam qutisi, fonar, elektr uzilib qolganda gugurt va zajigalka, telefon uchun zaryadlovchi va tashqi akkumulyator, zaxira akkumulyatorli radio, shaxsni tasdiqlovchi hujjatlarning nusxalari boʻlishi kerak. Shu bilan birga, fuqarolarga toʻplamga vaqtni tez oʻtkazish uchun stol oʻyinlarini kiritish tavsiya qilingan.

Finlyandiya va Latviya fuqarolar uchun inqirozli vaziyatlarda qanday harakat qilish boʻyicha koʻrsatmalarni onlayn tarzda joylashtirdi, Estoniya esa tegishli uslubiy materiallarni yangilab, aholiga tarqatdi. Shvetsiya 2024-yil oxirida “Inqiroz yoki urush holatida” qoʻllanmasini qayta nashr etdi va tarqatdi. Unda havo hujumlari paytida boshpana topish va oziq-ovqat hamda suv zaxiralari boʻyicha maslahatlar mavjud.

Polsha Mudofaa vazirligi yanvar oyida joriy yilning oxirigacha har bir oilani tirik qolish uchun qoʻllanma bilan taʼminlash rejasini eʼlon qilgan edi. Mamlakat Ichki ishlar vazirligi qoʻshimcha ravishda barcha fuqarolar kamida 72 soat davomida hukumat yordamisiz mustaqil yashashga tayyor boʻlishlari kerakligini taʼkidladi.

2021-yilda Buyuk Britaniya Rossiyani oʻz xavfsizligi uchun eng keskin va dolzarb tahdid deb atagan. Bu haqda 2030-yilgacha boʻlgan davrga moʻljallangan mamlakat xavfsizligi, mudofaa va tashqi siyosat masalalari kompleks sharhida muhokama qilingan. 2025-yil aprel oyi boshida MI6 sobiq boshligʻi Aleks Yanger Buyuk Britaniya hukumati Rossiya va AQSH oʻrtasidagi yaqinlashuv tufayli zudlik bilan qayta qurollanish rejasini ishlab chiqishi zarurligini aytgan edi.

Oʻz navbatda, “The Telegraph” gazetasi Buyuk Britaniya Rossiyaga mustaqil ravishda qarshi turish uchun yetarli resurslarga ega emasligi haqida xabar berdi. Mamlakat armiyasi general-leytenanti Rob Magovan parlamentdagi eshituvda oʻq-dorilarga joriy xarajatlar “duch kelayotgan tahdidlarga mos kelmasligini” aytib, bu yoʻnalishda sarmoyani koʻpaytirish zarurligini taʼkidlagan.

Buyuk Britaniyaning Rossiyaga qarshi keng koʻlamli harbiy harakatlar olib borish qobiliyati haqidagi savolga Magovan mavjud zaxiralar va qurol-yarogʻ zaxiralari ikki oydan koʻpiga yetmasligini tan olgan.