Havo tarkibidagi chang zarralari uylar, ishxonalar, avtomobillarning eshik – derazalaridan sizib kirib, yopiq xonalar havosini ham chang zarrachalari bilan ifloslantirishi mumkin. “Sanepidqoʻmita” bunday paytda nima qilish kerakligi toʻgʻrisida maʼlumot berdi.

Unga koʻra, changli havoda quyidagi chora-tadbirlarni koʻrishni tavsiya qilingan:

• koʻchaga iloji boricha kamroq chiqish;
• ishga, oʻqishga, xarid uchun koʻchaga chiqqanda tibbiy niqob taqish va har 2 soatda almashtirish;
• koʻchadan uyga qaytgach dush qabul qilish (soch va yuz-koʻzlarni yaxshilab yuvish);
• kalit, koʻzoynak, telefon va sumkani namlangan salfetka bilan yaxshilab artish;
• koʻchaga kiyib chiqqan kiyimlarni yuvish;
• ustki kiyimlarni (kostyum, plash, palto va boshqalar) maska taqqan holda tashqarida yaxshilab qoqish;
• nim taʼsir etuvchi tuzli suv bilan tomoq va burunlarni tez-tez chayish;
• koʻproq suyuqlik (iliq) ichish, iloji boʻlsa koʻk choy, naʼmatak damlamasini ichish;
• yogʻli, qovurilgan, dudlangan, tuzlangan, shoʻr, achchiq taomlarni cheklash;
• suyuq sabzavotli taomlar, sut va sut mahsulotlari (qatiq, kefir va boshqalar), koʻkatlarni isteʼmol qilish.
• changni koʻp toʻplanishini oldini olish va uyni hamda yuzalarni toʻgʻri tozalash kerak:
• uy, ishxona va mashina eshiklari va derazalarini zich yopish;
• chang yigʻilishi mumkin boʻlgan hamma narsalarni chang yutkich yordamida tozalash kerak (gilam, yumshoq mebel, yumshoq oʻyinchoqlar va boshqalar). Yumshoq mebelni qoqishdan avval usti namlangan latta bilan oʻralishi tavsiya etiladi.
• Chang yigʻilishi mumkin boʻlgan barcha yuzalarni (pol, shkaf, ishchi yuzalar va boshqalar) kun davomida bir necha marta namlangan latta bilan yaxshilab artish kerak;
• oyoq kiyimlarini eshik oldida qoldirish va imkon qadar tezroq yuvib qoʻyish kerak;
• xona havosi optimal namligini taʼminlash: hoʻl sochiqlarni xonalarga osish, kattaroq sigʻimli idishlarga suv solib qoʻyish.

Shuningdek, “Sanepidqoʻmita” nafas yoʻli surunkali kasalliklari bor yurtdoshlarimizga changli havoda tashqariga chiqmaslikni tavsiya qilgan.