Foto: Akmal Muhammadev/“Xalq soʻzi”

Toshkent shahrida davom etayotgan Markaziy Osiyo mamlakatlari yetakchi ayollari muloqoti majlisi doirasida “Xotin-qizlarga nisbatan zoʻravonlikka qarshi kurashish va huquqiy himoya” mavzusida beshinchi sessiya oʻtkazildi.

Sessiyada Ozarbayjon, Qozogʻiston, Qirgʻiziston, Tojikiston, Turkmaniston va Oʻzbekiston parlamentlari, jamoat tashkilotlari, xalqaro tashkilotlar vakillari hamda fuqarolik jamiyati faollari ishtirok etdi.

Turkmaniston Mejlisining Fan, taʼlim, madaniyat va yoshlar siyosati qoʻmitasi raisi B. Miradova sessiyada moderatorlik qildi.

Ishtirokchilar xotin-qizlarni zoʻravonlikdan himoya qilish, qonunchilik va himoya tizimini mustahkamlash, yuridik va psixologik yordam koʻrsatish imkoniyatlarini kengaytirish, gender stereotiplarga qarshi chora-tadbirlar koʻrish, davlat va fuqarolik jamiyati hamkorligini rivojlantirish kabi masalalarni muhokama qildi.

Shuningdek, oilada zoʻravonlikning oldini olishga qaratilgan qonunlar, ijtimoiy qoʻllab-quvvatlash markazlari va krizis uylarining ahamiyati alohida taʼkidlandi.

Sessiya yakunida ishtirokchilar ayollarning xavfsizligini taʼminlash, ularning huquq va salohiyatini toʻliq roʻyobga chiqarish hamda mintaqa davlatlari oʻrtasida tizimli hamkorlikni yanada mustahkamlash ahamiyatini qayd etdi.