Foto: Qonunchilik palatasi matbuot xizmati

Oliy Majlis Qonunchilik palatasining 23-iyul kuni boʻlib oʻtgan majlisida “Taʼlim faoliyatini tartibga solish toʻgʻrisida”gi qonun qabul qilindi. Bu haqda Qonunchilik palatasining matbuot xizmati xabar berdi.

Maʼlum qilinishicha, “Milliy tiklanish” partiyasi tomonidan ishlab chiqilgan tashabbus maʼruza oʻqib, oson pul topish yoʻllarini oʻrgatishga vaʼda bergan shaxs (infoqallob) larga qarshi kurashishga qaratilgan.

“Bunday tadbirlarda aholi, ayniqsa, yoshlar ongi va madaniyatiga turli yot qarashlar, gʻoyalar, hissiyotlar singdirilmoqda. Taʼkidlash kerakki, tadbir tashkilotchilari tomonidan goʻyoki maʼrifiy deb hisoblanadigan koʻp sonli yigʻinlar, uchrashuvlar, oʻquv va suhbatlar maxsus bilim va tajribaga ega boʻlmagan, asosiy maqsadi yolgʻon yoʻli bilan pul ishlash boʻlgan soxta trenerlar va lektorlar tomonidan amalga oshirib kelinmoqda”, degan maʼruzachi OʻzLiDeP deputati Shahnoza Xolmahamatova.

Uning soʻzlariga koʻra, bunday tadbirlarda koʻpxotinlilik, jinsiy kamsitish, feminizm, axloqiy buzuqlik, huquqbuzarliklar targʻib qilinib, tinglovchilar ongini manipulyatsiya qilish holatlari koʻpaymoqda.

Deputat hozirda bunday faoliyatni toʻxtatish, taqiqlash yoki tartibga solishning iloji yoʻqligini taʼkidladi. Chunki amaldagi qonunchilikda maʼruza, taqdimot, seminar, mahorat darsi, kurs, leksiya, marafon va davra suhbati tarzida oʻtkaziladigan faoliyat turlari aks ettirilmagan.

Deputatlar birinchi qoidabuzarlik uchun qanday jarima nazarda tutilganini eʼlon qilishmadi, biroq takror sodir etilgan huquqbuzarlik uchun jismoniy shaxslar BHMning 10 baravaridan 15 baravarigacha (3,4 million soʻmdan 5,1 million soʻmgacha), mansabdor shaxslar esa BHMning 15 baravaridan 20 baravargacha (5,1 mln soʻmdan 6,8 mln soʻmgacha) jarimaga tortiladi.

Avvalroq, endi boʻlajak haydovchilar birinchi tibbiy yordam koʻrsatish boʻyicha amaliy imtihonlardan ham oʻtishi kerakligi haqida xabar berilgandi.