Mamlakatimiz Prezidenti Respublika Maʼnaviyat va maʼrifat kengashi yigʻilishida davlat idoralari rahbarlari hamda xodimlarining muntazam ravishda teatrlarga tashrif buyurishi zarurligini taʼkidlagan edi. Shu asosda Xorazm viloyatida har oy davlat xizmatchilarining teatrga borishi tizimli tarzda tashkil etilmoqda.

Konstitutsiya bayrami arafasida, dam olish kuni munosabati bilan, viloyat hokimi Joʻrabek Raximov boshchiligida viloyat, shahar va tumanlardagi tashkilotlar rahbarlari Xorazm viloyati musiqali drama teatriga tashrif buyurib, “Lazgining tugʻilishi” nomli folklor-etnografik spektaklni tomosha qildilar.

— Rahbar maʼnaviyatini shakllantirishda teatrning oʻrni beqiyos, — deydi Yangiariq tumani hokimining oʻrinbosari Ernazar Xudoyberganov. — Har oyning bir kunni ish jadvalimizda “teatr kuni” sifatida belgilab olganmiz. Viloyat teatri jamoasi ijrosida milliy va jahon dramaturgiyasining sara asarlari asosida sahnalashtirilayotgan spektakllar tomoshasi biz uchun maroqli hordiq, bir vaqtning oʻzida maʼnaviy ozuqa boʻlmoqda. Muhimi, bu anʼana farzandlarimiz va nabiralarimizning ham teatr sanʼatiga qiziqishini oshirmoqda.

Odilbek Odamboyev, “Xalq soʻzi”.