“Qishloq xoʻjaligiga moʻljallangan yerlardan foydalanish boʻyicha davlat xizmatlarini koʻrsatish tizimini yanada takomillashtirish toʻgʻrisida”gi Hukumat qarori (594-son, 18.09.2025-y.) qabul qilindi.

Qarorga koʻra, qishloq xoʻjaligiga moʻljallangan sugʻorilmaydigan yerlarda yer uchastkasidan ruxsat etilgan foydalanishning asosiy turiga mos obyektlarni joylashtirishdan oldin axborot tizimlari orqali ariza beruvchida ushbu uchastkasiga ijara huquqining mavjudligi, davlat yer kadastri boʻyicha yer uchastkasining jami maydoni tekshiriladi.

Ichki xoʻjalik yer tuzish loyihasida yer uchastkasidan ruxsat etilgan foydalanishning asosiy turiga mos boʻlgan obyektlarni yer uchastkasi tarkibidagi sugʻorilmaydigan yerlarga joylashtirish (qurish) nazarda tutiladi.

Chorvachilik yoʻnalishlarida ijaraga berilgan qishloq xoʻjaligiga moʻljallangan sugʻorilmaydigan yerlarda 1 gektardan koʻp boʻlmagan, biroq ijaraga berilgan kontur maydonining 1 foizidan oshmagan qismida qishloq xoʻjaligiga xizmat koʻrsatuvchi obyektlarni joylashtirishga ruxsat etiladi.

Yer uchastkasidan ruxsat etilgan foydalanishning asosiy turiga mos boʻlgan obyektlarni joylashtirishga yoʻl qoʻyiladigan ayni bir yer maydoni bir marta belgilanadi, kelgusida ushbu obyekt turini oʻzgartirishga xizmat koʻrsatuvchi yer maydonini oshirmaslik sharti bilan yoʻl qoʻyiladi.