Isroil harbiylari 13-dekabr, shanba kuni Gʻazo shahridagi avtomobilga qilingan hujumda HAMASning yuqori lavozimli qoʻmondoni Rayed Saidni oʻldirganini maʼlum qildi. Bu haqida “Reuters” nashri xabar berdi.

Maʼlumotlarga koʻra, Gʻazo shahridagi avtomobilga qilingan hujum oqibatida besh kishi halok boʻlgan va kamida 25 kishi yaralangan. HAMAS rasmiylari qoʻmondon Rayed Saidning halok boʻlganini darhol tasdiqlamagan.

Isroil rasmiylari oʻldirilgan HAMAS qoʻmondoni guruhning qurol ishlab chiqarish tarmogʻini yaratish va rivojlantirishga katta hissa qoʻshgan shaxslardan biri ekanini taʼkidlagan.

“Soʻnggi oylarda u HAMASning imkoniyatlari va qurol ishlab chiqarishini qayta tiklash uchun harakat qilayotgandi. Bu esa sulhni qoʻpol ravishda buzishdir”, — deydi Isroil rasmiysi.

HAMAS harakati, oʻz bayonotida Isroilning mazkur xujumini sulh kelishuvining buzilishi deb atagan. Biroq, qoʻmondon Rayed Saidning halok boʻlgani yoki yoʻqligi toʻgʻrisida maʼlumot bermagan.

Bu hodisa oktyabr oyida Gʻazoda sulh bitimi kuchga kirganidan beri HAMASning yuqori lavozimli amaldorining oʻldirilishi boʻyicha katta shov-shuvlarga sabab boʻldi.