Odam savdosi bilan shugʻullangani uchun Interpol kanallari orqali qidirilayotgan shaxs O‘mon Sultonligidan Oʻzbekiston Respublikasiga ekstraditsiya qilindi. Bu haqda Ichki ishlar vazirligi matbuot xizmati xabar qildi.

O‘mon Sultonligidan Interpol Maskat Milliy Markaziy Byurosi xodimlari kuzatuvida mamlakatimiz Jinoyat kodeksining 135-moddasida nazarda tutilgan odam savdosida ayblanayotgan fuqaro Oʻzbekistonga qaytarildi.

Qayd etilishicha, ushbu fuqaro xalqaro qidiruvga berilgan boʻlgan. Interpol kanallari orqali qidiruvdagi shaxsning O‘mon hududida ekanligi aniqlanib, joriy yilning aprel oyida ushbu mamlakatda hibsga olingan.

Bir oy oldin Toshkent Interpol Milliy markaziy byurosi xodimlarining hamrohligida O‘mondan Oʻzbekistonga ikki nafar jinoyatchi ayol ekstraditsiya qilindi.

Toshkentdagi Islom Karimov nomidagi Xalqaro aeroportda qidiruvda boʻlgan shaxs Interpol Milliy markaziy byurosi va respublika huquqni muhofaza qilish organlari vakillariga topshirilgan.

Avvalroq Toshkent xalqaro aeroportida 31, 23 va 18 yoshli qizlarni fohishalik qilishi uchun Tailandga yubormoqchi boʻlgan 53 yoshli ayol qoʻlga olingani haqida xabar qilgandik.