Qorovulbozor tumanida joylashgan harbiy qism uchun zamonaviy sport majmuasi qurilib foydalanishga topshirildi. Bu arafada turgan Vatan himoyachilari kuni oldidan yurtimiz sarhadlarini sergaklik bilan qoʻriqlab turgan askar va zobitlarga munosib tuhfa boʻldi.

Futbol, basketbol, voleybol, badminton, tennis, uzunlikka sakrash, tosh koʻtarish maydonlari hamda yugurish yoʻlaklaridan iborat bu maskan harbiy xizmatchilarning kasbiy mahoratlarini oshirishga, ularni jismoniy jihatdan chiniqtirishga xizmat qiladi. Majmuaning loyiha qiymati 4 milliard 87 million soʻm boʻlib, u Buxoro neftni qayta ishlash zavodi homiyligida barpo etildi.

Sport majmuasini foydalanishga topshirishga bagʻishlab oʻtkazilgan tadbir bayramona ruhda kechdi. Unda soʻz olganlar davlatimiz tomonidan Vatan himoyachilarining kasbiy mahoratlarini oshirish, oilalari ijtimoiy himoyasi borasida salmoqli ishlar bajarilayotganini taʼkidladi. Tadbirda bir harbiy xizmatchiga ikki xonali uy kaliti, harbiy qismga 2 ta kvadrotsikl, oʻn nafarga yaqin xizmatchiga harbiy unvonlar topshirildi. Tadbirda askarlar quvonchiga sherik boʻlgan bir guruh oʻquvchi yoshlar kitoblar jamlanmasi bilan taqdirlandi. Darvoqe, ular uchun harbiy qism muzeyiga sayohat ham esda qolarli kechdi. Muzeyning boyitilgan yangi qismi taqdimoti oʻtkazildi.

Istam IBROHIMOV

“Xalq soʻzi”