Fargʻona jamoat salomatligi tibbiyot instituti professor-oʻqituvchilari tomonidan viloyat boʻylab bepul tibbiy koʻriklar oʻtkazib borish yaxshi anʼanaga aylangan. Xususan, joriy yilning 26-noyabr kunidan boshlab Fargʻona shahrida joylashgan 11 ta oilaviy poliklinikada reja-jadvali asosida navbatdagi bepul tibbiy koʻriklar boʻlib oʻtmoqda.

Bu galgi keng qamrovli tibbiy aksiyadan koʻzlangan asosiy maqsad profilaktik tekshiruvlarni samarali tashkil etish va kasalliklarni erta aniqlashga qaratilgan. Shuningdek, aksiya jarayonida aholi oʻrtasida sogʻlom turmush tarzini targʻib etish, toʻgʻri va sogʻlom ovqatlanish, sport bilan shugʻullanish hamda jismoniy faollikni oshirish bilan bogʻliq tushuntirish-targʻibot ishlari olib boriladi.

Aksiya doirasida 10 dan ortiq yoʻnalishda umumiy va tor soha shifokorlari koʻrigi, profilaktik tekshiruvlar, tibbiy tavsiyalar va kerakli yoʻllanmalar hamda amaliy maslahatlar beriladi. Har qanday koʻrik mutlaqo bepul boʻlib, unda oilaning barcha aʼzolari ishtirok etishi mumkin.

—Bugun oʻzimiz istiqomat qiladigan mahallada joylashgan 1-oilaviy poliklinikada farzandlarim bilan birga koʻrikdan oʻtib, kerakli maslahatlarni oldik,—deydi Fargʻona shahrida istiqomat qiluvchi Lobar Azizova.—Sogʻligimizni asrash va kasalliklarni erta aniqlashga xizmat qiluvchi bunday koʻriklar doimiy ravishda oʻtkazib kelinayotgani bizni behad mamnun etadi.

Yuzma-yuz muloqotda mutaxassislar yuqumli kasalliklar mavsumi boʻlgan ushbu kunlarda bolalar sogʻligini himoya qilish boʻyicha zaruriy tavsiyalar berishdi. Shuningdek, havo ifloslanishi sharoitida koʻchada imkon qadar niqob taqib yurish hamda darmondorilarga boy tabiiy mahsulotlarni koʻproq isteʼmol qilish muhimligi taʼkidlandi.

Aytish joiz, Fargʻona shahri boʻylab oʻtkazilishi koʻzda tutilgan tibbiy koʻriklar 9-dekabr sanasiga qadar davom etishi rejalashtirilgan.

Botir MADIYOROV, “Xalq soʻzi”.