Bugun — taniqli shoir va adib, Oʻzbekiston Respublikasida xizmat koʻrsatgan jurnalist, Oʻzbekiston Respublikasida xizmat koʻrsatgan yoshlar murabbiysi Abdusaid Koʻchimov tavallud topgan kun.

Ijodkorning “Mening Oʻzbekistonim”, “Toshburgut”, “Mening yulduzim”, “Chanoq”, “Halqa”, “Ikki bahor”, “Umid daraxtlari”, “Qiyofa”, “Yosuman”, “Baland togʻlar”, “Koʻzlarimning qarogʻidasan”, “Muhabbat bogʻlari”, “El suv ichgan daryolar”, “Saylanma”, “Safar” nomli publitsistik, sheʼriy va nasriy kitoblari oʻquvchilar qoʻliga yetib borgan.

Yoniq soʻz va koʻngil bilan yashab, fidoyi mehnati, yurtsevarligi tufayli koʻpchilikning eʼtirofiga sazovor boʻlib kelayotgan ijodkorning sermazmun maqolalari, dilbar sheʼrlari, hikoyalarini oʻqir ekansiz, koʻnglingizga yorugʻlik inadi.

Istardikki, zavqu shavq, ijodkorlik ruhiyati Abdusaid Koʻchimovni hech qachon tark etmasin.

VATAN

Boshingda osmonu, qoshingda quyosh,

Tasviring chizolmay musavvir halak.

Shoir soʻz axtarib qotiradi bosh,

Buloqday qaynaydi oshufta yurak.

Parivash jamolin qiladi koʻz-koʻz,

Bagʻringda barq urgan har gul, har qiyoq.

Faqat shoiringga yetishmaydi soʻz,

Faqat musavvirga yetmaydi boʻyoq.

TANTI OʻZBEK

Saxovatli saxiy kuzdek

Saodatli eldir oʻzbek,

Buqaboʻyin — man-manlarga

Parvo qilmas janda-boʻzdek.

Jahondagi biron millat,

El-ulusdan yoʻqdir kami.

Yulduzlardek boqiy qudrat —

Ajdodlarin qutlugʻ shaʼni.

Bobolarin qancha xalqlar

Bizniki, deb talashadi.

Bunday sharaf — shoyon taxtlar

Oʻzbekka xoʻp yarashadi.

Azal-abad sochar yogʻdu

“Avesto”dek boʻstonlari.

Jasoratga jasur koʻzgu

“Alpomish”bek dostonlari.

Doʻstlariga mehri quyosh,

Doʻstlariga qurbon joni.

Pashsha kabi ezar, bebosh

Allop-qallob, bevafoni.

Havas bilan boqar dunyo

Togʻday koʻrkam savlatiga.

Dur mahliyo, nur mahliyo

Oʻzbekiston davlatiga.

Ne-ne fotih, ne-ne xoqon

Sinab achchiq omadini,

Ega olmay tutdi motam

Oʻzbekning alp qomatini.

MIRZO ULUGʻBEK HAYKALI QOSHIDA

Yulduzlarni sanash mumkindir balkim,

Hisoblash mumkindir sayyoralarni.

Sanab sanogʻiga yetolmas hech kim

Oʻzbek zamindagi allomalarni.

Mana, ming yillarkim hayratda bashar

Beruniy, Navoiy, Kubrolarimga.

Yana ming asrlar taʼzimga shoshar

Mirzo Ulugʻbekdek daholarimga.