Eron Rossiya harbiy-dengiz floti va Islom inqilobi qoʻriqchilar korpusi ishtirokida harbiy mashqlarni boshladi. Bu haqida BILD nashri xabar berdi.

Unda aytilishicha, Eron mamlakat janubiy qirgʻoqlari yaqinida Rossiya harbiy-dengiz floti boʻlinmalari ishtirokida mashgʻulotlarni boshlagan. Maʼlumotlarga koʻra, ushbu harbiy mashgʻulotlarda Eron oliy rahnamosi Oyatulloh Ali Xomanaiyga boʻysunuvchi Islom inqilobi qoʻriqchilar korpusi ham ishtirok etmoqda.

Maʼlumki, avvalroq, Yevropa Ittifoqi Islom inqilobi qoʻriqchilar korpusini rasman terrorchi tashkilot deb eʼlon qilgan edi. Kreml esa ushbu vaziyatga nisbatan ehtiyotkorona pozitsiya egallab, tomonlarni vazminlikka chaqirgan.

“Biz mintaqada misli koʻrilmagan keskinlashuvni kuzatyapmiz. Biroq siyosiy va diplomatik vositalar, shuningdek, muzokaralar ustuvor boʻlishiga umid qilamiz”, — degan Rossiya prezidenti matbuot kotibi Dmitriy Peskov.

Germaniya mudofaa vazirligi Bundesver qoʻshinlarining Eron chegarasidan qariyb 120 kilometr uzoqlikda joylashgan Shimoliy Iroq hududidan qisman olib chiqilganini tasdiqlagan.