Namangan viloyati markazidagi Porloq mahallasi hududiga joylashgan ushbu bogʻ bundan ancha yillar ilgari barpo etilgan boʻlib, soʻnggi paytlarda qarovsiz holga tushib qolgan edi. Mahalliy hokimlik balansiga olingach uni aholi uchun xavfsiz, qulay saylgohga aylantirish maqsadida tizimli ishlar amalga oshirilishi bilan zamonga mos yangi koʻrinishdagi istirohat va koʻngilochar maskan sifatida oʻz eshiklarini qaytadan ochdi.

Bu yerda loyiha doirasida Respublika byudjetidan 7,8 milliard soʻm mablagʻ ajratilib, hududda keng koʻlamli qurilish va obodonlashtirish ishlari bajarildi. Jumladan, elektr tarmoqlari toʻliq yangilandi, sugʻorish tizimi rekonstruksiya qilindi, hudud obodonlashtirilib, qaytadan koʻkalamzorlashtirildi. Eng ahamiyatlisi, ushbu loyiha natijasida 75 ta yangi ish oʻrni yaratildi, 35 nafardan ortiq tadbirkor oʻz faoliyatini boshlash imkoniyatiga ega boʻldi.

- Yangilangan bogʻ barcha uchun ochiq boʻlib, u faqat yigit-qizlarning oʻzi emas, balki barcha fuqarolar, kattalar hamda bolajonlar uchun ham qulay va mazmunli dam olish oshyoni sifatida xizmat qiladi, — deydi yoshlar ishlari agentligi Davlatobod tuman boʻlimi boshligʻi Umidbek Valijonov. – Ayni paytda bu yerda bunyodkorlik tadbirlari davom ettirilmoqda. Yaqin vaqt ichida bogʻ toʻliq rekonstruksiyadan chiqarilib, qoʻshimcha ravishda yana koʻplab koʻngilochar oʻyinlar va sport infratuzilmasini yaratish hamda xizmat turlarini kengaytirish rejalashtirilgan.

Qudratilla NAJMIDDINOV. “Xalq soʻzi”.