Yurtimiz yoshlarida zamonaviy fanlarni, jumladan, dasturchilik, dizaynerlik, xorijiy tillarni oʻrganishga ishtiyoq katta. Gʻijduvon tumanidagi chekka goʻshalardan biri sanalgan Oqrabot qishlogʻida oʻtkazilgan oʻziga xos soʻrovnoma ham xuddi shuni koʻrsatdi. Tuman markazidan chamasi 18 kilometr uzoqlikdagi mazkur goʻsha va yon-atrofdagi mahallalarda yashovchi yetti ming nafardan ziyod oʻgʻil-qiz aynan shu yoʻnalishlarda saboq olish istagini bildirdi.

Yoshlar talab-istaklaridan kelib chiqib, bu yerda “IT–shaharcha” barpo etildi. Maskanda yosh avlod vakillari zamonaviy fan sirlarini bepul oʻrganibgina qolmay, IT xizmatlari koʻrsatish, frilanserlik bilan shugʻullanish, startaplar tayyorlash borasida maʼlum bir koʻnikmalar hosil qilishadi.

— Raqamli texnologiyalarni chuqur oʻzlashtirish koʻp jihatdan xorijiy tilni bilishga bogʻliq, — deydi mazkur maskanda yoshlarga saboq berayotgan ingliz tili oʻqituvchisi Sitora Muzaffarova. — Shogirdlarimiz buni yaxshi anglagan holda mashgʻulotlarga faol qatnashishmoqda. Jamoamiz oʻziga bildirilgan ishonchni oqlaydi, albatta.

“IT–shaharcha” bir mavsumda 180, yil davomida esa 700 nafardan koʻproq oʻgʻil-qizni qamrab olish imkoniyatiga ega.

Istam IBROHIMOV, “Xalq soʻzi”.