Prezidentning “Davlat bojxona xizmati organlarining faoliyati samaradorligini oshirish boʻyicha chora-tadbirlar toʻgʻrisida” farmoni qabul qilindi.

Farmonga asosan, davlat bojxona xizmati organlari faoliyati samaradorligini oshirishning asosiy maqsadli koʻrsatkichlari etib 2026-yilga qadar bojxona deklaratsiyalarini inson omilisiz rasmiylashtiruv ulushini 2 barobarga oshirish, 2028-yilga qadar bojxona koʻrigini 21 foizdan 15 foizga tushirish va 2030-yilga qadar sunʼiy intellekt elementlaridan foydalangan holda xavfni boshqarish tizimi samaradorligini 2 barobarga oshirish kabilar ekanligi belgilandi.

Shu bilan bir qatorda, 2025-yil 1-iyuldan boshlab veterinariya va fitosanitariya sohasida tashqi savdo yuklariga tegishli har qanday hujjatlarga muhr va shtamp bosish hamda ularni yozma tarzda roʻyxatga olish amaliyoti bekor qilinadi, barcha tartibotlar ushbu hujjatlarni elektron shaklda tasdiqlash orqali amalga oshiriladi. Tovarlar eksportida xalqaro shartnomalarda qatʼiy belgilangan holatlar bundan mustasno.

Bundan tashqari, bojxona omborida saqlash muddati tugagan va 90 kun ichida talab qilib olinmagan tovarlar sud qaroriga koʻra davlat egaligiga oʻtkazilib, qonun doirasida tasarruf etiladi.