AQSH Senati mamlakat tarixidagi eng uzoq hukumat faoliyatining toʻxtab qolishi — “shatdaun”ni toʻxtatishga imkon beradigan qonun loyihasini qabul qildi, deb xabar berdi “The New York Times”.

Hujjat uchun 52 nafar respublikachi va sakkiz demokrat ovoz berdi. Qarshi chiqqan 40 senatordan faqat bittasi respublikachi boʻldi. Ovoz berish jarayoni “shatdaun”ning 41-kunida boʻlib oʻtdi.

Qonun loyihasiga koʻra, hukumat 2026-yil 30-yanvargacha vaqtincha moliyalashtiriladi, shuningdek, majburiy taʼtilga chiqarilgan minglab federal xizmatchilar maoshlari qayta tiklanadi.

Respublikachilar Donald Tramp yaqin kunlarda qonunni imzolashiga umid bildirmoqda.

Maʼlumot uchun, AQSHda moliyaviy yil 1-oktyabrdan boshlanadi. Ammo siyosiy kelishmovchiliklar tufayli Kongress byudjetni oʻz vaqtida tasdiqlay olmagan. Asosiy kelishmovchilik sababi — 2025-yil oxirida amal qilish muddati tugaydigan arzon tibbiy sugʻurta toʻgʻrisidagi qonunda nazarda tutilgan subsidiyalarni uzaytirish masalasi boʻldi. Demokratlar byudjetni qoʻllab-quvvatlashni aynan shu subsidiyalarni saqlab qolish sharti bilan bogʻlagan.