Illyustrativ foto

Amerika Qoʻshma Shtatlari 1-sentyabrdan boshlab Yevropa Ittifoqining ayrim tabiiy resurslari, samolyotlari va umumiy farmatsevtika mahsulotlariga 15 foizlik bojlarni olib tashlaydi.Bu haqda Yevropa Ittifoqi va Oq uyning qoʻshma bayonotida maʼlum qilindi.

Shu yilning 28-iyul kuni AQSH va Yevropa Ittifoqi oʻrtasida savdo bitimi imzolangan boʻlib, unga koʻra Bryussel AQSHning 750 milliard dollarlik energiya resurslarini sotib olish, shuningdek, Yevropadan AQSHga sarmoyani 600 milliard dollarga oshirish va Amerika qurollarini sotib olish majburiyatini olgandi. Buning evaziga Vashington Yevropa tovarlari uchun bojlarni ikki baravar — 30 foizdan 15 foizgacha kamaytirishga vaʼda berdi.

Joriy yilning 29-iyul kuni “Politico” nashri Tramp Yevropa Ittifoqiga savdo bitimini tuzish uchun bosim oʻtkazgani haqida xabar berdi. Maʼlum boʻlishicha, AQSH rahbari yevropaliklarga “jiddiy xavf ostida” ekanliklari haqida ogohlantirilgan xat yoʻllagan. Shundan soʻng Yevropa Ittifoqi muzokaralar stoliga oʻtirib, AQSH bilan bitim tuzishga rozi boʻlgan.

Bir qator ekspertlar Amerika Qoʻshma Shtatlari va Yevropa Ittifoqi oʻrtasidagi savdo bitimi Yevropa sanoati uchun “iqtisodiy falokat” tahdid soladi, degan xulosaga kelishdi. Qayd etilishicha, qisqa muddatda Yevropa Ittifoqi mamlakatlari eksport hajmining pasayishiga, uzoq muddatda esa investitsiyalarning chiqib ketishiga va sanoatga bosimga duch keladi.

“Teng shartlar asosida adolatli kelishuv oʻrniga, endi Yevropaning asosiy tarmoqlariga ogʻirlik qiladigan va AQSHga tarkibiy jihatdan qaramligimizni yanada chuqurlashtiradigan murosaga erishildi”, — degan edi oʻshanda Yevropa Parlamenti vitse-prezidenti Katarina Barli “Tagesspiegel” nashri bergan intervyusida.

Uning soʻzlariga koʻra, bu kelishuv yutuq emas, balki Yevropa zaifligining yaqqol belgisidir. Yevrokomissiya kuchli bosim ostida taslim boʻlgan.

Fransuz sotsialistlari yetakchilari Yevropa Ittifoqi va AQSH oʻrtasidagi savdo kelishuvini Yevropa Ittifoqiga aʼzo davlatlar uchun sharmandalik va boʻysunish yoʻli deb taʼriflagandi.

Fransiya sotsialistik partiyasi bosh kotibi Pyer Juvyening aytishicha, Yevropa uchun bu boʻysunish kelishuvi.

Sotsialistik partiya yetakchisi va birinchi kotibi Olivye For esa bu kelishuvni “sharmandalik” deb atagandi.