Иллюстратив фото

Америка Қўшма Штатлари 1 сентябрдан бошлаб Европа Иттифоқининг айрим табиий ресурслари, самолётлари ва умумий фармацевтика маҳсулотларига 15 фоизлик божларни олиб ташлайди.Бу ҳақда Европа Иттифоқи ва Оқ уйнинг қўшма баёнотида маълум қилинди.

Шу йилнинг 28 июль куни АҚШ ва Европа Иттифоқи ўртасида савдо битими имзоланган бўлиб, унга кўра Брюссел АҚШнинг 750 миллиард долларлик энергия ресурсларини сотиб олиш, шунингдек, Европадан АҚШга сармояни 600 миллиард долларга ошириш ва Америка қуролларини сотиб олиш мажбуриятини олганди. Бунинг эвазига Вашингтон Европа товарлари учун божларни икки баравар — 30 фоиздан 15 фоизгача камайтиришга ваъда берди.

Жорий йилнинг 29 июль куни «Politico» нашри Трамп Европа Иттифоқига савдо битимини тузиш учун босим ўтказгани ҳақида хабар берди. Маълум бўлишича, АҚШ раҳбари европаликларга «жиддий хавф остида» эканликлари ҳақида огоҳлантирилган хат йўллаган. Шундан сўнг Европа Иттифоқи музокаралар столига ўтириб, АҚШ билан битим тузишга рози бўлган.

Бир қатор экспертлар Америка Қўшма Штатлари ва Европа Иттифоқи ўртасидаги савдо битими Европа саноати учун «иқтисодий фалокат» таҳдид солади, деган хулосага келишди. Қайд этилишича, қисқа муддатда Европа Иттифоқи мамлакатлари экспорт ҳажмининг пасайишига, узоқ муддатда эса инвестицияларнинг чиқиб кетишига ва саноатга босимга дуч келади.

«Тенг шартлар асосида адолатли келишув ўрнига, энди Европанинг асосий тармоқларига оғирлик қиладиган ва АҚШга таркибий жиҳатдан қарамлигимизни янада чуқурлаштирадиган муросага эришилди», — деган эди ўшанда Европа Парламенти вице-президенти Катарина Барли «Tagesspiegel» нашри берган интервьюсида.

Унинг сўзларига кўра, бу келишув ютуқ эмас, балки Европа заифлигининг яққол белгисидир. Еврокомиссия кучли босим остида таслим бўлган.

Француз социалистлари етакчилари Европа Иттифоқи ва АҚШ ўртасидаги савдо келишувини Европа Иттифоқига аъзо давлатлар учун шармандалик ва бўйсуниш йўли деб таърифлаганди.

Франция социалистик партияси бош котиби Пьер Жувьенинг айтишича, Европа учун бу бўйсуниш келишуви.

Социалистик партия етакчиси ва биринчи котиби Оливье Фор эса бу келишувни «шармандалик» деб атаганди.