Videodan kadr

Kecha, 18-dekabr kuni Turkiya kubogi musobaqasining 1-tur doirasida “Galatasaroy” klubi oʻz maydonida “Bashakshehir” jamoasini 1:0 hisobida magʻlubiyatga uchratdi.

Uchrashuvga hakam tomonidan qoʻshib berilgan 2-daqiqa oʻtib borayotgan pallada “Galatasaroy” himoyachisi Arda Unyay “Bashakshehir” futbolchisi Abbosbek Fayzullayevni qoʻpollik bilan toʻxtatib qoldi. Ushbu holatda uchrashuvni boshqarib borgan hakam oʻyinni davom ettirishga ishora qildi.

Ammo ushbu vaziyat oʻyindan keyin turk matbuotida va futbol jamoatchiligi orasida koʻplab bahs va munozaralarga sabab boʻldi. Hattoki, “Bashakshehir” klubining matbuot xizmati ham ushbu holat aks etgan videoni oʻzining rasmiy sahifasiga joyladi.

Xoʻsh, ushbu vaziyatda penalti belgilanishi kerakmidi? Shu savol bilan “Xalq soʻzi” muxbiri OʻzFHM hakamiga murojaat qildi. Mutaxassisning javobi esa quyidagicha boʻldi:

“Bu yerda “Galatasaroy” himoyachisi 100 foiz toʻpga oʻynadi. U hatto Abbosbek Fayzullayevni koʻrgani ham yoʻq. Toʻgʻri, bu yerda kontakt boʻldi. Ammo bu penalti belgilashga yetarli asos boʻlmaydi. Futbol qoidalariga koʻra, bunga oʻxshash vaziyatlar uchun penalti berilmaydi. Hakam toʻgʻri qaror qildi”.