Фото: «Дунё»

Онаси вафотидан сўнг Туркиядаги болалар уйига жойлаштирилган 5 ёшли бола Ўзбекистонга қайтарилди. Бу ҳақда «Дунё» ахборот агентлиги хабар берди.

Маълум бўлишича, Ўзбекистон фуқароси бўлган аёл Туркиядаги маҳаллий шифохоналардан бирида фарзандини дунёга келтирган. Бироқ кўп ўтмай касаллик туфайли вафот этган. Чақалоқ бир неча йил давомида суриялик ва ўзбекистонлик аёллар томонидан парвариш қилинган.

Шундан сўнг, ота-она қармоғисиз қолган бола холасига топширилган. Аммо боланинг туғилганлик бўйича ҳеч қандай ҳужжати бўлмагани сабабли вояга етмаган фуқаро сифатида давлат томонидан мажбурий равишда Истанбул шаҳрида жойлашган болалар уйига жойлаштирилган. Фуқаронинг жиянини васий сифатида ўз қармоғига олиш талаби вояга етмаган фуқарога оид ҳужжатларнинг йўқлиги сабабли болалар уйи маъмурияти томонидан рад этилган.

Ўзбекистоннинг Туркиядаги элчихонаси ва Истанбул шаҳридаги Бош консулхонаси томонидан тегишли давлат идоралари билан олиб борилган қатор музокаралар давомида, адвокатлар жалб қилинган ҳолда суд томонидан болани холасининг қармоғига ўтказиш бўйича қарор чиқарилишига эришилган.

Юртдошларимизнинг муаммоли вазиятлари ҳал этилгандан сўнг улар учун «Ватанга қайтиш гувоҳномаси» Бош консулхона томонидан расмийлаштириб берилди ва улар Ўзбекистонга қайтарилган.

Ижтимоий ҳимоя миллий агентлиги вакиллари ота-она қармоғисиз қолган ва холаси қўлига ўтган болага яшаши, таълим-тарбияси ҳамда унинг манфаатлари қонунчилик доирасида, ўрнатилган тартибда таъминланишини маълум қилди.