Иллюстратив фото

Россия, Хитой, Туркия ва Эрон ўртасидаги иттифоқ эҳтимоли бўлиб қолган жаҳон урушининг олдини олиши мумкин, акс ҳолда АҚШ «ўзини бошқара олмай қолади». Бу фикрларни Туркиянинг «Ватан» партияси етакчиси Дўғу Перинчек айтиб ўтди.

Аввалроқ Туркия президентининг яқин сафдоши, Миллатчи Ҳаракат партияси етакчиси Девлет Баҳчели АҚШ ва Исроилни ўз ичига олган «ёвузлик коалицияси»га қарши оғирлик сифатида Туркия, Россия ва Хитой ўртасида стратегик иттифоқ тузишни таклиф қилган эди. Баҳчели ўз ташаббусини шарҳлар экан, Туркия президенти Режеп Таййип Эрдоған уни батафсил кўриб чиқишга ҳали улгурмаганини таъкидлади, бироқ «ҳаммаси яхши томонга ўзгаришига» умид билдирди.

Перинчекнинг фикрича, омон қолиш учун Туркия «Осиёда ўз ўрнини эгаллаши» керак.

«Туркия, Россия, Эрон ва Хитойнинг бирлашиши нафақат минтақавий, балки глобал можаронинг олдини олишга қодир. Акс ҳолда, «АҚШ ўзини бошқара олмай қолиши мумкин», — деди сиёсатчи. Унинг қўшимча қилишича, Евроосиё курси Анқара учун «зарурат»га айланган.

Сиёсатчи, шунингдек, АҚШ ва Исроил Туркияга таҳдид солаётганини таъкидлади. Унинг таъкидлашича, мамлакат олдида муҳим танлов турибди ва бу қарорга бир қанча омиллар таъсир кўрсатмоқда.

Перинчекнинг фикрича, глобал тизимга интеграцияга қаратилган Ғарб томонидан ўрнатилган иқтисодий дастур ўз имкониятларини тугатган. Унинг қўшимча қилишича, агар Туркия ўз мустақиллиги, бирлиги ва ҳудудий яхлитлигини сақламоқчи бўлса, «АҚШ ва Исроил таҳдидларига қарши туриши керак».

«Туркия Евроосиёдаги ўрнини белгилаши керак бўлган даражага етди, чунки бу унинг мавжудлигининг шарти ва ўз келажаги олдидаги масъулиятдир» — дейди сиёсатчи.

«Ватан» Туркиянинг биринчи президенти Мустафо Камол Отатурк позицияларини қўллаб-қувватловчи, Ғарбга ва АҚШга қарши позицияга эга бўлган сўл қанот турк партиясидир. Партия ўзини 1919 йилда ташкил этилган Социалистик ишчи ва деҳқон партиясининг вориси деб ҳисоблайди. У Туркия парламентида вакиллик қилмасада, минтақаларда таъсирчан куч бўлиб қолмоқда. Партиянинг 50 мингдан ортиқ аъзоси бор.