Аҳмадали ШEРНАЗАРОВ/«Халқ сўзи». Халқаро аҳамиятга эга бўлган умумий фойдаланишдаги автомобиль йўлларининг Сирдарё вилоятидаги аҳоли яшаш пунктларидан ўтган қисмини ёритишда қуёш панелларидан фойдаланиш ҳажми ошиб бормоқда.

Яқинда «М-34» «Тошкент — Душанбе» автойўлининг 121 — 130 километрлари оралиғига ана шундай электр ҳосил қилувчи ускуналар ўрнатилди. Бундан олдин эса мазкур автойўлнинг 81 — 83 километрлари оралиғини айни энергия манбаи билан ёритиш йўлга қўйилган эди. Тез орада «А-376» автомобиль йўлининг 224 — 229 километри оралиғидаги аҳоли яшаш пунктига ҳам қуёш панеллари жойлаштирилади.

— Эндиликда умумий фойдаланишдаги автомобиль йўллари қурилиши билан боғлиқ лойиҳаларда айни автойўлларнинг тунги ёритилишга зарурат бўлган барча қисмига қуёш панеллари ўрнатиш назарда тутиляпти, — дейди Сирдарё автомобиль йўллари бош бошқармаси эксплуатация бўлими шуъба бошлиғи Ерлан Шералиев. — Негаки, ушбу муқобил энергия манбаининг афзалликлари кўп. Аввало, қуёш панеллари туфайли йўл ёриткичлар ток билан узлуксиз таъминланади. Бир кунда тўплаган қуввати бир неча тунга етади. Ёритиш харажати сезиларли даражада камаяди. Муҳими, транспорт воситалари ва пиёдалар ҳаракати хавфсизлиги таъминланади.