Фото: AP

АҚШ президенти Дональд Трамп «Fox News» телеканалига берган интервьюсида россиялик ҳамкасби Владимир Путинга нисбатан сабри тугаб бораётганини айтди.

«Ҳа… тугайди ва тезда тугайди», — деди Трамп журналистларнинг саволига жавоб берар экан.

Шу йилнинг 10 сентябрь куни Трамп яқин кунларда Путин билан телефон орқали мулоқот қилишини айтганди. Оқ уй раҳбарининг сўзларига кўра, унинг Россия раҳбари билан суҳбати шу ҳафта ёки кейинги ҳафта бошида бўлиб ўтади.

Кремль матбуот котиби Дмитрий Песковнинг айтишича, ҳозирча икки президент ўртасида бўлажак телефон мулоқоти бўйича келишувлар йўқ. Кейинроқ у Россия Украинадаги можарони тинч йўл билан ҳал қилиш йўлидан боришга тайёрлигини таъкидлади. Песковнинг айтишича, музокаралар жараёни яшин тезлигида натижалар беради деб умид қилмаслик керак.

Унинг таъкидлашича, Россия томони Украинадаги можарони сиёсий ва дипломатик йўллар билан ҳал қилишдан манфаатдор ва тайёрлигини сақлаб қолади.

Бу Песковнинг журналистнинг «Кремль Трампнинг Россияга қарши санкциялар жорий этилиши мумкинлиги ва Путинга нисбатан сабр-тоқати тугаётгани ҳақидаги баёнотларини эшитдими?», деган саволига жавоби бўлди.

«Киев томонидан жараён сунъий равишда секинлаштирилмоқда, европаликлар масалага аралашмоқда, инқирознинг асл сабабларига эътибор қаратмоқчи эмас», — дейди Песков. Унинг қўшимча қилишича, Россия очиқ ва мулоқотга тайёр.

Шу йилнинг 13 сентябрь куни Трамп Шимолий Атлантика альянси мамлакатларига мактуб йўллаб, унда у Россияга қарши жиддий санкциялар жорий этишга тайёрлигини ёзган, аммо бунинг учун альянснинг барча аъзолари бир қарорга келиши ва ҳақиқатан ҳам Россия нефтини сотиб олишни тўхтатиши керак.