BBC томонидан тасдиқланган видеоларда кўплаб қуролланган одамлар ва ёнаётган мақбарани кўриш мумкин.

“Ҳайят Таҳрир аш-Шам” ҳаракати бошчилигидаги исёнчилар яшин тезлигида Сурияни қўлга киритиб, Асадлар оиласининг 54 йиллик ҳукмронлигига нуқта қўйди. Мамлакатни ташлаб қочган президент Башар Асад ва унинг оиласига Россия бошпана берди.

Бутун мамлакат бўйлаб марҳум президент Ҳафиз ҳамда унинг ўғли Башарнинг ҳайкаллари ва суратлари уларнинг ҳукмронлигига барҳам берилганини нишонлаётган сурияликларнинг шодиёналари остида йўқ қилинмоқда.

2011 йилда Башар Асад демократия руҳидаги тинч намойишни шафқатсизларча бостириб, мамлакатни вайронкор фуқаролик урушига гирифтор қилган, оқибатда ярим миллиондан ортиқ суриялик ҳалок бўлган, 12 миллион фуқаро ўз уйларини ташлаб кетганди.

Ҳафиз Асад Сурияни 1971 йилдан 2000 йилда вафотигача, ҳокимият ўғлига топширилгунга қадар шафқатсизларча бошқарган.

Мамлакат аҳолисининг қарийб 10 фоизини ташкил этувчи кўплаб Алавийлар узоқ вақт ҳокимиятда бўлганларида Асадларни астойдил қўллаб-қувватлаганлар.

Улардан баъзилари энди ғалаба қозонган исёнчилар нишонига тушишидан қўрқишади.