Фото: Юнус Бўриев / “Халқ сўзи”

Сенатнинг ўн биринчи ялпи мажлисида “Сунъий интеллектни қўллаш орқали юзага келадиган муносабатлар тартибга солиниши муносабати билан Ўзбекистон Республикасининг айрим қонун ҳужжатларига қўшимча ва ўзгартиришлар киритиш тўғрисида”ги Қонун кўриб чиқилди.

Таъкидланганидек, мамлакатимизда сунъий интеллект технологияларини жорий этиш ҳамда қўллаш, рақамли маълумотлардан фойдаланилиш имкониятини ва уларнинг сифати юқори даражада бўлишини таъминлаш, ушбу соҳада малакали кадрлар тайёрлаш бўйича кенг кўламли ишлар амалга оширилмоқда.

Таҳлиллар сунъий интеллект технологияларидан фойдаланиш ҳамда уни молиялаштириш ҳажми ошиб бораётганини кўрсатмоқда.

Мазкур Қонун билан тегишли қонун ҳужжатларига, жумладан “Ахборотлаштириш тўғрисида”ги Қонунга сунъий интеллектни қўллаш орқали юзага келадиган муносабатларни тартибга солувчи ўзгартириш ва қўшимчалар киритилмоқда.

Хусусан, “сунъий интеллект” тушунчасига ҳуқуқий таъриф берилмоқда, ушбу соҳадаги давлат сиёсатининг асосий йўналишлари ҳамда махсус ваколатли органнинг вазифалари белгиланмоқда, ахборот ресурсларини яратишда ҳамда ахборот тизимлари ишида сунъий интеллектдан фойдаланишнинг умумий қоидалари ҳамда ушбу технологиялардан фойдаланишда шахсга доир маълумотлар дахлсизлигини таъминлашга қаратилган қоидалар белгиланмоқда.

Сенаторларнинг фикрича, ушбу Қонун сунъий интеллект технологияларини янада ривожлантиришга, ундан фойдаланишнинг умумий асосларини белгилашга ҳамда мазкур соҳада юзага келадиган муносабатларда фуқароларнинг ҳуқуқ ва эркинликларини янада ишончли ҳимоя қилишга хизмат қилади.

Қонун сенаторлар томонидан маъқулланди.