Фото: Юнус Бўриев / «Халқ сўзи»

Ўзбекистон Республикаси Олий Мажлиси Сенатида «Конституция ойлиги» муносабати билан «Очиқ эшиклар куни» тадбири ўтказилди. Тадбирда Тошкент давлат юридик университети профессор-ўқитувчилари ва талабалари, маҳаллий Кенгаш депутатлари, маҳалла раислари ҳамда жамоатчилик вакиллари иштирок этди.

Тадбир доирасида Сенатнинг конституциявий ваколатлари, қонун ижодкорлиги жараёни, қонунларни кўриб чиқиш ва маъқуллаш тартиби тўғрисида батафсил маълумот берилди. Иштирокчилар Сенат биносидаги ялпи мажлислар зали, қўмита мажлислари хоналари, кутубхона, музей, Медиа-марказ фаолияти ва иш жараёни билан танишдилар.

Шунингдек, сенаторлар Конституциянинг янги таҳририда белгиланган асосий тамойиллари, миллий қонунчиликни такомиллаштириш йўналишлари, парламент фаолиятининг ҳуқуқий асослари бўйича маърузалар тақдим этишди.

Мулоқот жараёнида иштирокчилар ўзларини қизиқтирган саволларга сенатор ва мутахассислардан жавоб олдилар.

«Очиқ эшиклар куни» ҳуқуқшунослар, ёшлар ва жамоатчилик учун Сенат фаолиятини ўрганиш, давлат бошқаруви ва қонун ижодкорлиги жараёнлари билан яқиндан танишиш имконини берди.