Баҳром БОЙМУРОДОВ/«Халқ сўзи». Сайхунобод тумани аҳли нафақат томорқадан унумли фойдаланиш, балки инвестиция киритиш, аҳолини иш билан таъминлаш, камбағалликни қисқартириш, тадбиркорликнинг турли йўналишларини йўлга қўйиш ва янада ривожлантириш борасида ҳам бошқа ҳудудларга ўрнак бўлмоқда. Шу маънода айтиш лозимки, «Сайхунобод тажрибаси» асосида бутун мамлакатимиз бўйлаб кенг кўламли ишлар кутилган самарасини бераётир.

Айни пайтда туманда янги лойиҳаларга киришилмоқда. Хусусан, буни «Фаровон» кичик саноат зонаси”да ташкил этилаётган корхоналар мисолида ҳам кўриш мумкин. Эътиборлиси, ушбу ишлаб чиқариш субъектларининг фаолият тури ҳудуднинг иқтисодий имкониятлари ва эҳтиёжларига монанд тарзда бўлиши таъминланмоқда. Дейлик, сўнгги йилларда бошқа туманлардаги каби Сайхунободда ҳам мош етиштириш кўлами анча кенгайди. Табиийки, мазкур такрорий экиннинг ҳосилини қайта ишлаш ва қадоқлашга бўлган эҳтиёж ҳам ортди. Натижада кичик саноат зонасида айни ва бошқа йўналишдаги корхоналар пайдо бўлаётир.

— Корхонамизда кунига 150-200 тонна мошни қайта ишлаш имконияти мавжуд, — дейди «JINQUIUWANG» масъулияти чекланган жамияти корхонасининг ижрочи директори Умид Каримов. – Хитойдан келтирилган дастгоҳларимиз қайта ишлаш жараёнида маҳсулотни ранги, тозалиги ва катта-кичиклигига қараб қадоқлайди. Келгусида 60 та янги иш ўрни яратишни режа қилганмиз. Ҳозирда аҳолидан ҳар килограмм мошни 11 000 сўмгача нархда сотиб оляпмиз. Айтиш лозимки, «Дурдона», «Маржон», «Ғалаба-104», «Наврўз» каби мошларнинг сифати ҳам, мазаси ҳам яхши, яъни харидоргир.

Кичик саноат зонасида «AS-UN- YEM» МЧЖ томонидан ташкил этилган ем ишлаб чиқариш корхонасида тайёрланадиган маҳсулот ҳам ички ва ташқи бозор талабларига мослиги билан диққатга сазовор. Ушбу корхонани бунёд этиш учун 10 миллион доллар инвестиция киритилган бўлиб, келгусида унда 100 та янги иш ўрни яратилиши кўзда тутилган. Туркия ускуналари асосида фаолият олиб боришга мўлжалланган корхонада 20 миллион долларлик маҳсулотни экспорт қилиш режалаштирилган.

Яна бир тадбиркорлик субъекти -«САЙХУН БАРАКА» МЧЖ эса донни қайта ишлашга ихтисослашган.

— Дастлаб 60 тонна буғдойни қайта ишлаш қувватига эга корхона қурилган эди, — дейди мазкур корхона иш бошқарувчиси Ғанишер Нихолов. — 2019 йилда 120 тонна буғдойни қайта ишловчи ускуналарни ўрнатдик. Бундан ташқари, 60 тонна шолини қайта ишлайдиган цехимиз ҳам бор. Яна 2025 йилнинг март ойидан бошлаб 200 тонна буғдойни қайта ишлашга мўлжалланган линиямиз ишга тушади.

Сайхунободда паррандачилик, мато ишлаб чиқариш, балиқчилик ва бошқа кўплаб соҳаларда ҳам истиқболли лойиҳалар амалга оширилмоқда. Натижада ҳудудда аҳолининг бандлигини таъминлаш баробарида уларнинг қўшимча даромад топиш имкониятлари ҳам кенгаймоқда.