Президент администрацияси раҳбари Саида Мирзиёева 22 ноябрь куни Доҳада Яқин Шарқ ва Шимолий Африка минтақасининг ёш ва истиқболли дизайнерларини қўллаб-қувватлашга қаратилган эътиборга молик ташаббусларидан бири бўлган «Fashion Trust Arabia» (FТА) жамғармасига ташриф буюрди.

Ташриф доирасида FТА платформаси фаолияти ва лойиҳалар билан яқиндан танишилган. Қайд этилишича, турдош ташаббуслар орасида «М7» маданият марказидаги минтақа ва унинг маданий меросига бағишланган «Threads of Impact» кўргазмаси алоҳида ажралиб туради.

«Дизайнерларимизнинг қўл меҳнати намуналари ва бетакрор миллий либосларини намойиш этувчи «Woven Legacies: Uzbekistanʼs Living Heritage» кўргазмаси доирасида Ўзбекистон тақдим этилаётганидан хурсандман», деб ёзади Саида Мирзиёева.

Шунингдек, Рем Коолҳаас ва Самир Бантал раҳбарлигидаги «Countryside: A Place to Live, Not to Leave» (Қишлоқ: тарк этиш эмас, яшаш учун макон) номли кўргазмага ташриф буюрилган. Унинг экспозициясида Ўзбекистоннинг ноёб илмий маскани — «Қуёш» институтига алоҳида эътибор қаратилган.

Президент администрацияси раҳбари, шунингдек, Қатар пойтахтининг диққатга сазовор маданий масканларида бўлиб ўтаётган кино фестивалида ҳам меҳмон бўлган.

Доҳадаги кино фестивали мустақил ва муаллифлик киносининг энг муҳим майдонларидан бири бўлиб, ўзига хос қарашлар ва дадил бадиий позицияга эга бўлган режиссёрларга ўз фикрларини билдириш имконини беради.

Фестиваль дастуридан ўнлаб мамлакатлардан фильмлар ўрин олган; ёш муаллифлар ва маҳаллий киноижодкорларга алоҳида эътибор қаратилган бўлиб, улар учун махсус бўлимлар ва танлов дастурлари ташкил этилган.

«Замонавий кино — долзарб кайфият ва маъноларни акс эттириш, айни пайтда жамиятимизни қандай мавзулар ташвишга солаётганини тушуниш усулидир», дейди Мирзиёева.