Самарқанд вилоятида жойлашган муҳим сув таъминоти корхоналаридан бири — «Дамхўжа магистрал сув таъминоти» жамиятида янги галерея типидаги сув олиш иншооти фойдаланишга топширилди.

Мазкур объект Давлатимиз раҳбарининг 2018 йил февраль ойида Бухоро вилоятига ташрифи чоғида берилган вазифаларга асосан 2020–2025 йиллар давомида барпо этилди. Лойиҳа қиймати 240 миллиард сўм бўлиб, иншоот Қорадарё ёқасида 35 гектар майдонда барпо этилган. Ушбу галерея 10–12 метр чуқурликда, 3 километр узунликда горизонтал ҳолда ётқизилган Д-1220 мм ли қувурлардан иборат. Қувурлардаги майда тешиклар орқали йиғилган сув 15,6 километр узунликдаги сув узатиш тармоғи орқали тозалаш иншоотига йўналтирилади. Эътиборлиси, бу жараён учун умуман электр энергияси талаб этилмайди.

— Лойиҳанинг асосий мақсади — ортиқча сарф-харажатсиз, табиий усулда сув олишни таъминлашдир, — дейди Қурилиш корхонаси иш бошқарувчиси Ўткир Тошпўлатов. — 3 километрлик тармоқда 25 та кузатув қудуғи мавжуд бўлиб, сув омбори ходимлари сув сатҳи ва ҳолатини мунтазам назорат қилиб боради. Бу ердан олинаётган сув Дамхўжа резервуарига етказилади ва у ерда қайта ишланиб, аҳолига тарқатилади.

Дамхўжа магистрал сув таъминоти иншооти Самарқанд, Навоий ва Бухоро вилоятларини тоза ичимлик суви билан таъминлаб келади. Илгаригача корхона орқали аҳолига бир суткада 150 минг куб метрга яқин сув етказиб берилган бўлса, галерея типидаги янги тизим ишга туширилгандан сўнг яна 100 минг куб метр қўшимча тоза сув олиш имконияти яратилди.

— Бугунги кунда Дамхўжада ишлаб турган насослар сонини 50 фоизга қисқартириш орқали электр энергияси тежалмоқда, — дейди Сув таъминоти ва оқова сув объектлари қурилиши бўйича инжиниринг компанияси УК директори Саъдулла Зиёдуллаев. — Ҳозирги кунда Самарқанд вилоятининг уч тумани, Навоий вилоятининг қарийб 80 фоизи ва Бухоро вилоятига 200 минг куб метр сув етказилмоқда. Шунинг 100 минг куб метри айнан мана шу галерея орқали олинмоқда. Бу эса ҳудудларда ичимлик суви таъминотини сезиларли даражада яхшилади.

Иншоотнинг очилиш маросимида сўз олганлар мамлакатимизда инсон манфаатларини таъминлаш борасида амалга оширилаётган ислоҳотларни таъкидлаб, Дамхўжада амалга оширилган ишлар ана шу ислоҳотларнинг ёрқин намунаси эканини қайд этдилар.

Тадбир доирасида, шунингдек, «Яшил макон» умуммиллий лойиҳаси доирасида корхона ҳудудини ободонлаштириш мақсадида юз тупга яқин мевали ва манзарали дарахт кўчатлари ҳам экилди.

Абдулазиз ЙЎЛДОШЕВ, «Халқ сўзи».