Пахтаобод туманида «Пайнет» шохобчасида қалбаки 500 АҚШ долларини ўтказган шахс ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.

Департаментнинг Пахтаобод тумани бўлими томонидан тадбиркорлик субъектларининг ҳуқуқларини ҳимоя қилиш юзасидан ўтказилган терговга қадар текширувда фуқаро И.Х. интернет тармоқларидаги ўйинлар учун ҳисоб рақамига пул ўтказиш мақсадида, «Сой бўйи» МФЙ ҳудудидаги «Paynet» хизмати билан шуғулланиб келган тадбиркор О.Ё.га қалбаки 500 АҚШ доллари ва 500 минг сўм пулларни бериб кетганлиги аниқланган.

Мазкур ҳолат юзасидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) билан жиноят иши қўзғатилиб, тергов ҳаракатлари ўтказилмоқда.

Таъкидланишича, қалбакилигини билмаган ҳолда қалбаки валюта қимматликларини олиб, уни кейинчалик ўтказган шахснинг қилмиши ҳам жиноий жавобгарликни келтириб чиқаради.

«Ўзаро ҳисоб-китобларни Ўзбекистон Республикаси ҳудудида қонуний тўлов воситаси ҳисобланган миллий валютада амалга ошириш орқали ўзингизни ноқонуний ҳаракатлардан асраган бўласиз», дейилади хабарда.