Пентагон Яқин Шарққа F-15E туридаги жанговар самолётларни жойлаштиришни бошлади. Бу ҳақда “Wall Street Journal” хабар берди.

Нашрнинг расмий манбалар ва самолётлар ҳаракатини кузатиш маълумотларига таяниб ёзишича, АҚШ қирувчи самолётлари 18 январь куни Иорданияга қўниб ўтган.

ОАВ хабарига кўра, АҚШ ҳарбий-денгиз кучларининг авианосец (самолёт ташувчи кема) зарба гуруҳи Жанубий Хитой денгизидан Марказий қўмондонлик ҳудудига, яъни Яқин Шарққа кўчирилмоқда. Қайд этилишича, минтақага қўшимча ҳаво ҳужумидан мудофаа тизимлари, жумладан “Patriot” ва THAAD мажмуалари ҳам жойлаштирилади.

“NewsNation” бу ҳаракатларни АҚШ ва Эрон ўртасидаги муносабатлар кескинлашгани билан изоҳлаган.

16 январга ўтар кечаси Эрон эҳтимолий Америка зарбалари хавфи сабаб ҳаво ҳудудини вақтинча ёпди. Бундан олдин Трамп, агар мамлакатдаги намойишларни бостиришда куч ишлатиш ва қон тўкишлар давом этса, шунингдек, намойишчиларга қарши ўқ узиш буйруғи берилса, Эронга зарба бериш билан таҳдид қилганди.

Эрон расмийлари эса ҳозирча музокаралар тарафдори эканини, бироқ зарурат туғилса урушга тўлиқ тайёрлигини билдирди.