Бугун Ўзбекистон миллий терма жамоаси октябрь ойидаги FIFA кунлари доирасидаги иккинчи ўртоқлик ўйинини ўтказди. Ушбу баҳсда Фабио Каннаваро шогирдларига 15 карра Жанубий Америка чемпиони Уругвай терма жамоаси рақиблик қилди.

Малайзияда ташкил этилган ўйин Марсело Бьелса бошқарувидаги жамоанинг 2:1 ҳисоби билан ғалабаси билан якунланди. Учрашувнинг биринчи бўлимида ҳисоб очилмади.

51-дақиқада “Палмейрас” клуби аъзоси Факундо Торрес гол киритиб, Уругвайни ҳисобда олдинга олиб чиқди. Орадан 10 дақиқа ўтиб, Хуан Санабрия жамоасининг иккинчи голини киритди.

82-дақиқада Русланбек Жиянов Ўзбекистон миллий терма жамоасининг ягона жавоб голига муаллифлик қилди. Таъкидлаш керакки, бу Ўзбекистон миллий терма жамоасининг Уругвай дарвозасига киритилган дастлабки голи сифатида тарихда қолди.

Ўйин айнан ушбу ҳисоб билан якунланди. Баҳсдан сўнг “Sofascore” портали Уругвай терма жамоаси аъзоси Федерико Виньясни ўйин қаҳрамони дея эътироф этди. Ушбу футболчининг ҳаракатлари портал томонидан 7,9 баллга баҳоланди.

Маълумот учун, Ўзбекистон миллий терма жамоаси навбатдаги ўйинларини ноябр ойида ўтказади. Ушбу баҳсларда “оқ бўрилар”га ким рақиблик қилиши кейинроқ аниқланади.