Истам ИБРОҲИМОВ/«Халқ сўзи». Республикамизнинг барча ҳудудларида Ўзбек тили байрамига бағишланган маънавий-маърифий тадбирлар кўтаринки руҳда ўтди.

Бухоро шаҳридаги Алишер Навоий ҳайкали пойи эрта тонгдан анвойи гулларга бурканди. Бу ерда она тилимизга давлат мақоми берилганининг 35 йиллиги муносабати билан маросим ўтказилди.

Унда сўз олганлар она тилимизнинг ўзлигимизни англашдаги ўрни ва аҳамияти, унинг мавқейини ошириш борасида амалга оширилаётган ишлар хусусида тўхталди. Талаба-ёшлар томонидан ўзбек тили мадҳ этилган шеърлар ёд айтилди.

Байрамнинг асосий тантанаси эса вилоят мусиқали драма театрида бўлиб ўтди. Маданий-маърифий соҳа вакиллари, тилшунослар, ижодкорлар, муаллимлар, ёшлар вакиллари қатнашган тадбирда «Давлат тили ҳақида»ги қонуннинг тарихий аҳамияти, тилимизни асраб-авайлаш қадрият даражасига кўтарилгани, Конституцияда давлат тилининг мақоми ҳуқуқий жиҳатдан мустаҳкамлаб қўйилгани тўғрисида сўз борди. Шу каби саъй-ҳаракатлар натижасида она забонимиз дунё тиллари қаторида ўз ўрнига эга бўлди. У халқаро минбарларда ҳам баралла янграяпти. Галдаги вазифа эса тилимиз софлигини сақлаш, унинг мавқейини мустаҳкамлашдан иборатдир.

Вилоят санъат усталари томонидан тайёрланган театрлаштирилган байрам дастури маданий-маърифий кечага ўзгача файз бағишлади.