Ҳолат Тойлоқ тумани Экология, атроф-муҳитни муҳофаза қилиш ва иқлим ўзгариши бўлими давлат инспекторлари томонидан ўтказилган навбатдаги кузатув рейд тадбири давомида аниқланди.

Бош бошқарма матбуот хизматининг маълум қилишича, Ўрай–Элипок маҳалла фуқаролар йиғини ҳудудидан оқиб ўтувчи Дарғом канали бўйида шу атрофда истиқомат қилувчи фуқаро Э.А. ўз бошқарувидаги махсус техника воситаси ёрдамида қум-шағал аралашмасини ноқонуний равишда қазиб олиб, юк ташувчи автотранспорт воситаларга ортиб келаётгани маълум бўлди.

Мазкур ҳуқуқбузарлик ҳолати юзасидан қонунчиликка мувофиқ тегишли тартибда чора кўрилди. Хусусан, фуқарога нисбатан Ўзбекистон Республикаси Маъмурий жавобгарлик тўғрисидаги кодексининг 70-моддаси тегишли қисмлари асосида маъмурий баённома расмийлаштирилиб, жами 33 миллион сўм миқдорида жарима ҳамда табиатга етказилган зарар ундириш белгиланди.

Қайд этилишича, сув ҳавзалари ва уларга туташ ҳудудларда қум-шағал материалларини рухсатсиз қазиб олиш атроф-муҳитга жиддий зарар етказиши билан бирга, экологик мувозанатнинг бузилишига сабаб бўлади. Шу боис бундай ҳолатларга нисбатан қатъий чоралар кўрилиши давом эттирилади.

Абдулазиз ЙЎЛДОШЕВ, «Халқ сўзи».