Қонун (ЎРҚ–1109-сон, 30.12.2025 й.) билан айрим қонун ҳужжатларига қўшимча ва ўзгартиришлар киритилди. Бу ҳақида «Ҳуқуқий ахборот» Telegram-каналида маълум қилинди.

Унда айтилишича, мазкур Қонун билан айрим қонун ҳужжатларига маҳаллий давлат ҳокимияти вакиллик органлари ҳамда маҳаллий ижро этувчи ҳокимият органларининг ваколатларини аниқлаштиришга қаратилган ўзгартириш ва қўшимчалар киритилган.

Жумладан, «Шаҳар йўловчилар транспорти тўғрисида»ги Қонунга киритилган қўшимчаларга кўра, маҳаллий ижро этувчи ҳокимият органларининг ваколатларига қуйидагилар кириши белгиланди:

• бекатлар, тўхтаб ўтиш ва диспетчерлик манзилларини, бошқа объектларни жойлаштириш, қуриш ва ободонлаштириш масалаларини ҳал қилиш;
• аҳолига транспорт хизмати кўрсатиш ҳақида шаҳар йўловчилар транспортини бошқариш органи билан шартнома тузиш ва транспорт ҳаракатини ташкил этиш режасини ишлаб чиқиш.
• йўловчилар ташиш ишининг сифати устидан назорат қилиш.

Шунингдек, маҳаллий давлат ҳокимияти вакиллик органлари автомобиль транспортини ривожлантириш комплекс минтақавий дастурларини тасдиқлайди ва уларнинг бажарилиши устидан назоратни амалга ошириши белгиланди.

Бундан ташқари, маҳаллий давлат ҳокимияти вакиллик органлари маҳаллий бюджетларнинг ёнғин хавфсизлиги, шу жумладан ёнғиндан сақлаш хизматининг таъминоти харажатларига доир қисмини тасдиқлаши кўзда тутилди.

Қонун расмий эълон қилинган кундан эътиборан кучга киради.