Гап Ғиждувон туманидаги “Гулистонобод” маҳалласи ҳақида бормоқда. Бу ерда бутун бошли марказ барпо этилиб, фойдаланишга топширилди.

Уч қаватли замонавий бинода маҳалла “еттилиги” нинг самарали ишлаши учун барча шарт-шароитлар яратилган. Кутубхона жойлашган. Аёллар учун “Гўзаллик салони”, эркаклар сартарошхонаси, ёшларнинг хорижий тилни ўрганишлари учун ўқув курслари, тикувчилик ва қандолат цехи, фитнес зал, савдо дўкони – буларнинг барчаси ҳудудда истиқомат қилувчи аҳолининг ташвишини енгиллаштиради, фуқаролар, хусусан, ёшларнинг қимматли вақтни мазмунли ва фойдали ўтказишига имкон беради.

— Бу марказ маҳаллага узукка кўз қўйгандек ярашиб тушди, — дейди масканнинг фойдаланишга топширилиши муносабати билан ўтказилган маросим иштирокчиси, халқ депутатлари туман Кенгаши депутати М. Раҳматова. — Шу каби иншоотлар юртимизда “Инсон қадри учун” тамойилининг ҳаётга изчил татбиқ этилаётганидан далолат беради.

Маҳалланинг кўркам маркази “Ислом тараққиёт банки” томонидан ажратилган 4 миллиард 500 миллион сўм миқдоридаги маблағ эвазига барпо этилди. Эътиборлиси, у туманда кейинги бир ойда фойдаланишга топширилган иккинчи шундай шинам иншоотдир. Сал аввалроқ “Жовгари” маҳалласи ҳам янги бинога эга бўлганди.

Истам ИБРОҲИМОВ

«Халқ сўзи».