Саминжон ҲУСАНОВ/«Халқ сўзи». Ўзбекистон Республикасининг шу йил 30 сентябрь куни қабул қилинган «Креатив иқтисодиёт тўғрисида»ги Қонуни тарғиботига бағишланган тадбир Жалақудуқ туманида ўтказилди. Қўрғонтепа, Хўжаобод, Булоқбоши, Жалақудуқ туманлари ҳамда Хонобод шаҳар Кенгашлари депутатлари ва жамоатчилик вакиллари қатнашган ушбу тадбирда Олий Мажлис Сенатининг Халқаро муносабатлар, ташқи иқтисодий алоқалар, хорижий инвестициялар ва туризм масалалари қўмитаси раиси Равшанбек Алимов иштирокчиларни Қонуннинг мазмун-моҳияти билан таништирди.

— «Креатив» сўзи лотин тилидан ўзбек тилига таржима қилинганида «Яратиш», «Бунёд этиш» маъносини билдиради, — дейди ёшлар етакчиси Шерзодбек Турсунбоев. — Бугунги кунда ривожланган давлатларда креатив иқтисодиётга катта эътибор қаратилади. Мисол учун, Индонезияда бир йилда 1 млрд. доллар маблағ ажратилиб, 15 та лойиҳага асос солинган. Натижада ялпи ички маҳсулот ҳажми 7 фоизга ошди. Буюк Британияда эса 2035 йилгача ушбу йўналишга мўлжалланган стратегия белгилаб олинган. Унга асосан 2,1 млн. нафардан зиёд фуқаролар фаолияти ташкил этилди. Бу орқали ялпи ички маҳсулот ҳажми 5,8 фоизга ортишига эришилмоқда. Ўзбекистонда ҳам ушбу соҳа тобора тараққий этмоқда. Ҳозир бу борада фаолият олиб бораётган ҳамюртларимиз сони 34 минг нафарга етди. Тадбир давомида фаолият тури қонун доирасида нечоғли мустаҳкамлаб қўйилганлиги тушунтирилди.

Таъкидланганидек, мазкур Қонун билан креатив иқтисодиёт учун зарур бўлган инфратузилмани яратиш ва қўллаб-қувватлаш механизмлари белгиланган. Жумладан, креатив индустрия парклари, кластерлар, инновацион ускуналар, технологиялар, рақамли дастурлар ва платформалар кириши назарда тутилган. Креатив иқтисодиёт ялпи ички маҳсулот ҳажмининг ортишига хизмат қилади.