Колумбия президенти Густаво Петро Кордова департаментига вертолётда парвоз қилаётган пайтида суиқасддан омон қолганини маълум қилди. Унинг сўзларини El Tiempo нашри келтирди.

Монтерия шаҳрида бўлиб ўтган вазирлар кенгаши йиғилишида давлат раҳбари 9 февраль куни кечқурун Кордовада қўна олмаганини айтди. Унинг таъкидлашича, вертолётга ўқ узилиши мумкинлигидан хавотир бўлган.

«Шуни тан олишим керакки, ўша пайтда мен ҳаётимга қилинган суиқасддан қутулиб қолдим, шу сабабли кеча етиб кела олмадим. Мен режалаштирилган жойга қўна олмадим. Ҳатто қўниш чироқлари ҳам ёқилмади. Биз тўрт соат давомида очиқ денгиз томон учдик ва умуман режалаштирилмаган жойга етиб бордик. Мен фарзандларим билан бирга суиқасддан қочдик», — деди Петро.

Аввалроқ Густаво Петро бир неча бор наркокартеллар уни ўлдиришни режалаштираётганини айтган эди.

El Tiempo маълумотига кўра, Кордовада Колумбиядаги энг йирик жиноий тузилмалардан бири — Clan del Golfo фаолият юритади. Ушбу картел ўтган ҳафта ҳукумат билан тинчлик музокараларини тўхтатишга қарор қилган. Бу қарор Петронинг Дональд Трамп билан картел етакчиси Хобанис де Хесус Авила Вильядиегони («Чикито Мало») қўлга олиш бўйича келишувга эришганидан кейин қабул қилингани айтилмоқда.