Одилбек ОДАМБОЕВ/«Халқ сўзи». Урганч шаҳридаги «Ёшлик» спорт мажмуасида ҳудудий тармоқлараро саноат ярмаркаси ўз ишини бошлади. Ушбу ярмаркани ўтказишдан асосий мақсад – саноат маҳсулотлари ишлаб чиқаришда кооперация алоқаларини ривожлантириш, хўжалик юритувчи субъектлар ўртасида ўзаро ҳамкорлик учун қулай шарт-шароитлар яратишдан иборат.

Ярмарканинг очилиш маросимида Хоразм вилояти ҳокими Жўрабек Раҳимов иштирок этиб, кўргазма павильонларидан жой олган, маҳаллий саноат корхоналарида ишлаб чиқарилган маҳсулотлар намуналари билан танишди, тадбиркорлар билан мулоқотда бўлди.

— Саноат ярмаркасида республикамизнинг барча ҳудудларидан келган ишлаб чиқарувчилар туризм, автомобилсозлик, қишлоқ хўжалиги техникаси, мебелсозлик, кимё ва тўқимачилик саноати бўйича ўз маҳсулотлари билан қатнашмоқда, — дейди Хоразм вилояти ҳокимининг маҳаллий саноатни ривожлантириш масалалари бўйича ёрдамчиси Фозилбек Худойберганов. — Кўргазмада инновацион ишланмалар асосида тайёрланган янги турдаги маҳсулотлар ҳамда импорт ўрнини босувчи буюмлар қатнашчиларнинг диққат эътиборини тортмоқда. Ярмарка эртага ўз ишини давом эттиради.