Бугун мамлакатимизда амалга оширилаётган ислоҳотлар моҳиятида «Халқ давлат идораларига эмас, давлат идоралари халқимизга хизмат қилиши керак», деган тамойил етакчилик қилмоқда. Буни шу кунларда ҳудудларда бўлиб ўтаётган халқ депутатлари маҳаллий Кенгашлари сессияларида ҳокимларнинг мурожаатлар йўллаётганликлари мисолида ҳам кўриш мумкин.

Хусусан, халқ депутатлари Термиз шаҳар Кенгаши сессиясида шаҳар ҳокими Исроил Худойбердиев аҳолига мурожаат қилар экан, ҳудудни ижтимоий-иқтисодий ривожлантириш бўйича 2021 йилда амалга оширилган ишлар ва келгуси йилдаги устувор вазифаларга алоҳида урғу қаратди.

Қайд этилганидек, кейинги йилларда Термиз мамлакатимизнинг жанубдаги гавҳари ўлароқ ижтимоий-иқтисодий жиҳатдан ривожланаётган шаҳарга айланиб боряпти. Кенг ва равон йўллар, янги қад ростлаётган кўп қаватли тураржойлар, маданий-маиший хизмат кўрсатиш объектлари шаҳар кўркига кўрк қўшмоқда ва яратилаётган қулай шарт-шароит аҳоли фаровонлигини оширишга хизмат қилаётир.

Юксалиш ва янгиланишлар ҳақида сўз юритганда шаҳарнинг ўсиш нуқталари қайси, деган савол туғилади. Бу, шубҳасиз, саноат ва хизмат кўрсатиш соҳалари ҳисобланади.

Жорий йил якуни билан саноат маҳсулотларининг ишлаб чиқариш ҳажми 1 трлн. 293 млрд.сўмни ташкил этиши кутилмоқда. Бу кўрсатгич аҳоли жон бошига ҳисобланганда 6 млн. 580 минг сўмга етади. Келгуси йилда ушбу рақамлар янада ортиб, аҳоли жон бошига 8 млн. 341 минг сўмга етказилиши режалаб олинган.

Худди шунингдек, бу йил якуни билан хизматлар ҳажми 2 трлн. 870,9 млрд. сўмга етказилиб, режа кўрсатгичи 126 фоизга бажарилади. 2022 йилда қиймати 447.5 млрд. сўмлик 35 та янги лойиҳани ишга тушириш ҳисобига 566 та иш ўрни яратиш кўзда тутилган. Натижада хизмат кўрсатиш ҳажми 3 трлн. 649,6 млрд. сўмга ортади.

Мурожаатда шулар хусусида атрофлича маълумот берилди. Шу билан бирга, келгуси йили биргина кичик бизнес субъектларини янгидан ташкил этиш ҳамда янги лойиҳаларни ишга тушириш ҳисобига чакана савдо айланмаси ҳажмини 3 трлн. 284,2 млрд. сўмга ошириш чора-тадбирлари кўрилаётгани маълум қилинди. Шаҳарда қурилиш-пудрат соҳаси ҳам жадал ривож топмоқда. Келгуси йили қурилиши режалаштирилган 33 та кўп қаватли уй-жой ҳамда янги лойиҳалар ҳисобига қурилиш ва пудрат ишлари ҳажмини 1 трлн. 667,1 млрд. сўмга етказиш мақсад қилингани ҳам шундан далолат беради.

Олиб бораётган саъй-ҳаракатлар туб негизида аҳоли бандлигини таъминлаш, улар реал даромадини кўпайтириш, фаровонлигини ошириш мақсади мужассам. Шаҳар ҳудудида амалга оширилган янги лойиҳалар эвазига жами 2 500дан ортиқ иш ўринлари яратилди. Бу қаноатлантирадиган даража эмаслиги ҳам мурожаатда айтиб ўтилди.

Мамлакатимизда ёшлар билан тизимли ишлаш ва уларнинг муаммоларини ҳал қилиш учун дунёдаги биронта давлатда бўлмаган, янги тизим - «Ёшлар дафтари» электрон платформаси ва жамғармасини ташкил этиб, унинг молиявий манбаларини яратилган. Мазкур янги тизим асосида Термиз шаҳрида ҳам сектор раҳбарлари томонидан жорий йилда 161 та «Ёшлар учрашувлари» ва ёшлар иштирокида сайёр қабуллар ўтказилди. «Ёшлар жамғармаси»га ҳозирги вақтга қадар 2 млрд. 615 млн. сўм маблағ жамғарилиб, 2 млрд 420 млн. сўм сарфланди.

Ижтимоий ҳимояга муҳтож 271 нафар ёшларга бир марталик моддий ёрдам кўрсатилиб, «Талабага мадад» лойиҳаси доирасида ва «Темир дафтар»да турган оилалардаги олий таълим муассасалари таълим олаётган 70 нафар ёшларнинг шартнома тўлови бир қисми тўлаб берилди. Ёшларни тадбиркорликка жалб этишга алоҳида эътибор қаратилиб, 969 нафар ёшларга жами 28 млрд. 471 млн. сўм кредит ажратилди.

Термиз шаҳрида асосан тадбиркорликни қўллаб-қувватлаш, аҳоли турли қатлами ўртасида тадбиркорлик руҳини уйғотиш, мавжуд муаммоларга дуч келган тадбиркорларни қўллаб-қувватлаш ишлари иқтисодиётнинг ўсиш суратларини яна ошираётир. Буни рақамлар ҳам кўрсатмоқда. Тадбиркорлик фаолиятини қўллаб-қувватлаш давлат жамғармаси томонидан бугунга қадар 58 та тадбиркорга 14,5 млрд. сўмлик амалий ёрдамлар берилган. 3 309 та тадбиркорлик субъектларига тижорат банклари томонидан барча молиялаш манбалари ҳисобидан жами бўлиб 715,3 млрд. сўмлик кредитлар ажратилди. Мазкур тадбиркорларга ажратилган кредитлар ҳисобига тадбиркорлар томонидан 1644 та янги иш ўрни яратилишига эришилди.

Сессия шу каби натижалар билан бирга, галдаги вазифалар ҳақида батафсил маълумотлар берилди ҳамда қатор таклиф ва мулоҳазалар ўртага ташланди. 

Илҳом Раҳматов, "Халқ сўзи".